Віктар ШНІП
Сабачыя гісторыі
Адзін сабака купіў газэту. Пачаў чытаць. Усё пра Граждана.
Адзін сабака пайшоў на Камсамольскае возера. А там шыльда «Выгул сабак з 17 да 19» — і навокал адны п’яныя Гражданы.
У аднаго сабакі нарадзіўся нэгар. Выйшаў сабака з радзільнага дому, а яму насустрач Граждан з шампанскім.
Адзін сабака ствараў ня толькі поле чытаньня, але і поле пісьма. Граждан у такі час любіў глядзець на сабаку, ня думаючы, што вечарам давядзецца спаць з жонкай.
Адзін сабака быў мадэрністам. А Граждан пайшоў далей — на суседзкім доме напісаў тэкст з трох літараў.
З адным сабакам пазнаёміўся Граждан. І сабаку давялося есьці макароны.
Аднаму сабаку споўнілася сто гадоў. Сабраліся сваякі, прыйшоў і Граждан з насілкамі і лапатай.
Адзін сабака напіўся нейкай гадасьці. Па дарозе дахаты сустрэў Граждана і прапанаваў яму руку і сэрца.
Да аднаго сабакі з Кіева прыехаў дзядзька. Граждан Гражданом, а гаворыць не па-сабачаму.
Да аднаго сабакі прыйшоў Граждан. І давай сабака яго частаваць. А Граждан узяў і аб’явіў сябе нашчадкам незаконна забітага Паўліка Марозава.
Адзін сабака ўкінуў у сьметніцу недакурак. Убачыў гэта Граждан, паклікаў людзей і расказаў, якія багатыя сабакі.
Адзін сабака зайшоў у краму. А ў краме гумовыя Гражданы.
Адзін сабака задумаўся над пытаньнем: «Што такое філязофія?» А Граждан зайшоў у пад’езд суседняга дому і абасцаў сьцяну.
Адзін сабака быў у лазьні. Бачыў голага Граждана.
Адзін сабака купіў кампутар. Граждан, праходзячы каля сабакі, сказаў: «Будзе яшчэ і на маёй вуліцы сьвята!»
Адзін сабака хадзіў па праспэкце. А Граждан езьдзіў на трактары, як пераможца пяцігодкі.
З адным сабакам здарылася няшчасьце. Граждан пакусаў.
Аднаму сабаку сказалі: «Ажэнісься — пашкадуеш, не ажэнісься — таксама пашкадуеш...» І толькі Граждану ніхто нічога не сказаў, бо ён і так быў Шапэнгаўрам.
Адзін сабака заявіў: «Мінулай ноччу я напісаў «Вайну і мір». Граждан не разгубіўся: «А я магу мухамораў наесьціся і памерці!»
Адзін сабака выкапаў яму. Ішоў Граждан і ўваліўся ў яе. Сядзіць Граждан у яме і сам сабе думае: «Можа хоць цяпер мне грамату дадуць...»
Адзін сабака адправіў Граждана ў камандзіроўку ў Мухаморск. Прыехаў туды Граждан і папрасіў гражданства.
Адзін сабака сеў на дыету. Даведаўся пра гэта Граждан і сеў на цьвік.
Ад гражданоў
«Сукай буду, а Гражданом ня стану» — падумаў сабака, прабягаючы каля Філярмоніі 25 сакавіка 2000 году.
«Гражданы-таварышы! Я ж свой!» — скавытаў сабака па дарозе да скуралупні.
Захацеў сабака пабрацца з сукай Гражданскім бракам. І пацягнуў яе ў ЗАГС, а там рамонт. «Эх, ізноў усё будзе ў нас не як у людзей», — падумаў сабака і павалокся пад царкву.
Сяржук Гр. Сабакевіч, Магілёў
Адзін Сабака пайшоў на выбары. А яму кажуць: «Сабакам не паложана!» Пабег тады Сабака ў ЗАГС і памяняў прозьвішча на Электарат.
В.В., Менск
Абрыдла сабакам сабачае жыцьцё, і пачалі яны акцыю гражданскага непадпарадкаваньня. А Граждан спаў.
Alex, Менск
Прыйшоў Граждан на мітынг, а міліцыянт яму: «Куды прэш, сабака?»
Былы Граждан
