Чачэнія
Прапала лінія фронту
У суботу ў штабе Аб'яднанае групоўкі расейскіх войскаў на Паўночным Каўказе паведамілі сэнсацыйную навіну: у "вызваленым" Грозным – паўтысячы чачэнскіх партызанаў, якія выдатна ўзброеныя.
Паводле зьвестак з таго ж штабу, сытуацыя ў Чачэніі зноў абвастраецца. Толькі за адзін дзень 3 чэрвеня чачэнцы зрабілі 28 атак на расейскія войскі. Паводле расейскіх вайскоўцаў, было забіта 168 чачэнцаў. Але ўвага! Яны былі забітыя пры спробе прарыву з Дагестану! Высьвятляецца, што там таксама каля паўтысячы партызанаў – "ня менш прадумана ўзброеных".
У той самы дзень у Інгушэціі, у Самашкінскім лесе, ізноў была абстраляная аўтакалёна расейцаў. Партызанаў гэтым разам не знайшлі. Нават калі зрабіць карэкцыю на расейскую прапаганду, даводзіцца канстатаваць, што вайна, як ракавая пухліна, толькі распаўзаецца па Каўказе. Калі падлічыць колькасьць нібыта забітых паўстанцаў, дадаць да іх палонных, дык усё адно атрымліваецца, што яшчэ больш за дзьве траціны чачэнскага войска ацалела разам са сваім галоўным камандаваньнем. Іх няма ў шматкроць прачасаных і "зачышчаных"расейцамі населеных пунктах. Дзе ж яно, чачэнскае войска? Цяпер – за сьпінаю ў акупантаў. Лінія фронту прапала. І сьмерць можа чакаць расейцаў ды іх памагатых паўсюль. Замах на мэра Грознага й гібель намесьніка прадстаўніка расейскага ўраду Зьверава і памочніцы грозьненскага мэра таму пацьверджаньнем. І гэта не ў лясох ці горах, а ў самым цэнтры "вызваленай" сталіцы Ічкерыі!
Нагадаю, што начальнік расейскага Генштабу Квашнін 2 чэрвеня заявіў, што вайсковая апэрацыя супраць чачэнцаў закончаная. У той жа дзень чачэнскія байцы падбілі расейскі гелікоптэр Мі-8.
Калі Квашнін агучыў палітычны курс цяперашняга кіраўніцтва Расеі, дык гэта можа азначаць, што неўзабаве пачнуцца мірныя перамовы, на якіх ад пачатку настойваў прэзыдэнт Ічкерыі генэрал Аслан Масхадаў. Гэта ўскосна пацьвердзіў і расейскі прэм'ер Касьянаў, які днямі заявіў, што менавіта палітычнае ўрэгуляваньне ёсьць цяпер для расейцаў "абсалютна прыярытэтным", і кіраўніцтва Расеі ўжо выпрацоўвае плян маштабнага ўрэгуляваньня крызысу ў рэгіёне. Калі не, і словы расейскага штабіста – звычайнае выхваленьне, а словы прэм'ера хлусьня, тады вайна будзе забіраць усё новыя й новыя ахвяры, а тэрыторыя вайны бяз фронту расьцягнецца ад Касьпія да Чорнага мора.
Гары Куманецкі
