Якія выбары безь Зянона?
18 лютага ў Менску адбылася Соймавая канфэрэнцыя Кансэрватыўна-Хрысьціянскай Партыі БНФ, якая заклікала Зянона Пазьняка выставіць сваю кандыдатуру на прэзыдэнцкіх выбарах. КХП лічыць, што Пазьняк здольны сабраць да 35% галасоў. “Гэта тая асоба, якая можа гарантаваць і будзе адстойваць нацыянальныя інтарэсы Беларусі”, — кажа Юрась Беленькі. На што старшыня цэнтравыбаркаму Лідзія Ярмошына падчас сустрэчы з журналістамі заявіла, што Пазьняк ня можа балятавацца на пасаду прэзыдэнта, бо не пражыў на тэрыторыі Беларусі дзесяці год непасрэдна перад выбарамі – а гэта, нібыта, неабходная ўмова для кандыдата.
Мы зьвярнуліся па камэнтар да актывіста КХП БНФ Алеся Чахольскага. Паводле ягоных словаў, заява Ярмошынай – ня больш чым прыватная думка грамадзянкі. “Зрэшты, яна сама сказала падчас сустрэчы – гэта, маўляў, яе “тэарэтычныя” меркаваньні, а афіцыйнае тлумачэньне можа даць толькі цэнтравыбаркам у поўным складзе, калі “зьбярэцца й вывучыць абставіны”. Выстаўляць сваю кандыдатуру ці не – Пазьняк вырашыць сам. Аднак ініцыятыўная група для збору подпісаў будзе створаная ў любым выпадку, незалежна ад таго, дзе знаходзіцца Зянон. На пытаньне, ці вернецца Пазьняк на радзіму, сп.Чахольскі адказаў, што гэта адбудзецца толькі ў тым выпадку, калі дэмакратычны блёк даможацца міжнародных гарантыяў бясьпекі Пазьняка. “Ну, якія ж выбары безь Зянона?” — сказаў Алесь Чахольскі.
Камэнтуючы словы Пазьняка пра тое, што ў хуткім часе на палітычнай сцэне можа зноў зьявіцца Віктар Ганчар, Чахольскі адзначыў, што Пазьняк мае палітычнае чуцьцё ды стратэгічнае бачаньне сытуацыі і спаслаўся на артыкул Зянона “Чорт у табакерцы”. “Магчыма, Старшыня мае нейкія зьвесткі пра лёс Ганчара”, — сказаў Алесь Чахольскі.
Алесь Кудрыцкі
