Дыскаграфія
“Палац” і dj Ray Хвісевіч
“ТАНЧЫЦЬ ПАЛАЦ”.
(р) 2001, Bulba Records.
Сябры! Зь вялікім задавальненьнем хачу вам паведаміць, што задума ды-джэя Рэя Хвісевіча бліскуча правалілася: нягледзячы на ўсе ягоныя намаганьні сапсаваць песьні “Палацу” ён ня здолеў. Варты музычны матэрыял зьнявечыць ня так проста.
У адрозьненьне ад аранжавальнікаў, якія горай, чым яна ёсьць, песьню зрабіць ня здольныя, ды-джэі, якія музычных акадэміяў не сканчалі, імкнуцца замяніць прафэсійныя навыкі аранжаваньня рознымі гукавымі штучкамі ды рытмічнымі выкрунтасамі. І чым больш яны нявечаць арыгінал, тым больш пасьпяховым лічыцца зробленае і тым круцейшым выглядае ды-джэй.
Рэй Хвісевіч паставіўся да песень даволі ашчадна. І хоць далёка не заўсёды ён бліскучы і вынаходлівы ў стварэньні гукавой ды рытмавай абалонкі песень, яны ў выніку трацяць ня так шмат, як маглі б. На сёньняшніх дыскатэках гэтыя адаптацыі фальклёру ня будуць выглядаць чужымі. А за кошт таго, што ў аснове рэміксаў ляжаць народныя песьні, праект наагул набывае арыгінальнасьць — па-за Беларусяй гэтыя песьні будуць успрымацца яшчэ і як экзотыка.
Цікава, што закрывае альбом набор аўтэнтычных музычных сэмплаў. Ня ўсе яны, праўда, такія аўтэнтычныя, але зь іх дапамогаю кожны з вас можа паспрабаваць, маючы адпаведны сынтэзатар, зрабіць нешта падобнае, што зрабіў з музыкай “Палацу” ды-джэй Рэй Хвісевіч.
Ды-джэй SLUHATCH
