Як паведаміў БелаПАН каардынатар фестывалю з беларускага боку Аляксей Мінчонак, журы — музычныя крытыкі, журналісты і прадзюсеры — выбралі дзевяць гуртоў. Гэта сталічныя каманды «РоСтра», «SKA!RB», «Sok», «Termin X», «Unia», «Weeping Twilight», «ZigZag», а таксама «Фляус і Кляйн» (Наваполацк) і «Indra» (Полацк). Дзесяты гурт — «Lilith» (Мінск) — заняў першае месца паводле вынікаў інтэрнет‑галасавання на музычным партале «Тузін гітоў» і стаў удзельнікам «Басовішча» без адборачнага канцэрта.
Усяго на фестываль паступіла прыкладна 50 заявак, з якіх журы адабрала 20 для ўдзелу ў канцэрце «Адборышча».
«Басовішча» («Basowiszcza») — фестываль музыкі маладой Беларусі, які праводзіцца штогод з 1990 года. Арганізатарам выступае Беларускае аб’яднанне студэнтаў у Польшчы.
«Басовішча‑2007» адбудзецца блізу Гарадка ў Падляскім ваяводстве Польшчы. У адрозненне ад мінулых гадоў, фестываль будзе доўжыцца тры дні, з 19 па 21 ліпеня, што, на думку арганізатараў, дасць магчымасць выступіць большай колькасці гуртоў. Акрамя вядомых беларускіх каманд — «Крама», «N.R.M.», «Neuro Dubel», якія пастаянна выступаюць на «Басовішчы», плануецца запрасіць на фестываль гурты з Польшчы, Украіны, Літвы і Італіі, паведаміў А.Мінчонак.
