Не — рэпрэсіўным законам!
Зварот грамадзкага аб’яднаньня “Беларуская асацыяцыя журналістаў” да грамадзянаў Рэспублікі Беларусі
Мы занепакоеныя тым, што ў краіне права на свабоднае выказваньне меркаваньняў, атрыманьне й распаўсюд інфармацыі апынулася пад пагрозай крымінальнага перасьледу. Прызнаныя вінаватымі ў паклёпе на прэзыдэнта й асуджаныя журналісты гарадзенскай газэты “Пагоня” Мікола Маркевіч і Павал Мажэйка. Найбліжэйшым часам перад судом паўстане галоўны рэдактар газэты “Рабочы” Віктар Івашкевіч. Яму інкрымінуецца “замах на паклёп і абразу” кіраўніка дзяржавы. У паклёпе на прэзыдэнта вінаваціцца й вядомы палітык Анатоль Лябедзька.
Такія абмежаваньні свабоды слова – праблема ня толькі журналістаў і палітыкаў, але й усяго грамадзтва. У Беларусі склалася сытуацыя, калі крытычныя выступы на адрас любога прадстаўніка ўлады могуць расцэньвацца як злачынствы, адказнасьць за якія прадугледжваюць артыкулы “Паклёп у дачыненьні да прэзыдэнта Рэспублікі Беларусі” (арт.367 Крымінальнага кодэксу), “Абраза прэзыдэнта Рэспублікі Беларусі” (арт.368 КК), “Абраза прадстаўніка ўлады” (арт.369 КК). Максымальнае пакараньне, прадугледжанае гэтымі артыкуламі, – пазбаўленьне волі на тэрмін да 5 гадоў.
Тым часам, усебаковае і аб’ектыўнае інфармаваньне грамадзянаў пра дзейнасьць уладных структураў зьяўляецца неабходнай умовай дэмакратычнага разьвіцьця грамадзтва. Празь незалежныя СМІ забясьпечваецца адкрытасьць уладаў, рэалізуецца дыялёг, які вядзе да разуменьня й згоды ў краіне.
Улічваючы сур’ёзнае абвастрэньне стасункаў улады і прэсы, ГА “Беларуская асацыяцыя журналістаў” выступае з ініцыятывай правядзеньня агульнанацыянальнай кампаніі за адмену вышэйзгаданых артыкулаў Крымінальнага кодэксу. Ужываньне гэтых артыкулаў вядзе да забароны крытычных выступаў у СМІ, падмены свабоды слова свабодаю прапаганды, спрыяе бескантрольнасьці дзяржаўных чыноўнікаў.
Не – законам, якія спараджаюць рэпрэсіі, страх і самавольства ўладаў!
ГА “БАЖ” заклікае падпісацца пад гэтым зваротам усіх, хто хоча жыць у свабоднай дэмакратычнай краіне, мець права публічна выказваць свой пункт гледжаньня і магчымасьць атрымліваць самую разнастайную інфармацыю.
