А.К., С.І.
***
Прызавы — кожны трэці
“Беларускія лятарэі” выпусьцяць новую сэрыю квіткоў “Імгненьне ўдачы” коштам 1000 рублёў. Іх плянуюць прадаць 120 тыс. Прызавым будзе амаль кожны трэці квіток. Цяпер у Беларусі дзейнічае дзясятак лятарэяў, недзе кожны шосты квіток — прызавы. Сёлета прадалі квіткоў на мільярд 480 млн. рублёў. Зь іх у бюджэт трапіла 131 млн. 915 тыс. рублёў, 700 млн. пайшло на прызавыя фонды.
Ільготы не для ўсіх
Сацыяльныя страхоўкі адменяць для прадпрымальнікаў-пэнсіянэраў, інвалідаў і студэнтаў. У Міністэрстве працы кажуць, што льготаў іншым прадпрымальнікам пакуль не дадуць. Сёньня запазычанасьць прадпрыемстваў і калгасаў пэнсійнаму фонду складае 75% ад патрэбы на выплаты пэнсіянэрам за месяц.
Веды за грошы
Урад зацьвердзіў сьпіс платных паслугаў у сфэры адукацыі. Так, школам дазволілі ладзіць дадатковыя заняткі з вучнямі за грошы. У найбліжэйшы месяц будуць распрацаваныя тарыфы на платныя паслугі.
Сто гадоў гарантыі
Маналітныя масты пачалі вырабляць на “Менскаблдарбудзе”. Каштуюць яны на 30% таньней, бо іх ня трэба зьбіраць з асобных жалезабэтонных частак. Прадпрыемства дае маналітнаму мосту гарантыю да 100 гадоў.
Стаўкі на дзяржзамову
Мінімальныя ганарары мастакам і скульптарам вызначыла Міністэрства культуры. Цяпер творцы, што выконваюць дзяржзамову, будуць атрымліваць ад трох базавых велічыняў (33300 руб.) за замалёўкі і эскізы да 400 БВ (4.440.000 руб.) за манумэнт.
Закон пра цукар
Дырэкцыя Скідальскага цукровага камбінату зьвярнулася да ўладаў Гарадзеншчыны з прапановай ініцыяваць закон, які б рэгуляваў адносіны паміж перапрацоўшчыкамі, пастаўнікамі сыравіны й рэалізатарамі. Цана на цукар павінна фармавацца на прадпрыемстве з улікам сабекошту прадукцыі, лічаць скідальцы. Сёньня яна ўсталёўваецца кіраўніцтвам краіны, пры гэтым інтарэсы пастаўнікоў сыравіны і перапрацоўшчыкаў амаль ня ўлічваюцца.
На “Шкло-Глушы” глуха
Драмай для жыхароў пасёлку Глуша (Бабруйшчына) сталася закрыцьцё мясцовага заводу, на якім працавала траціна двухтысячнага насельніцтва. Попыт на вырабы ААТ “Шкло-Глуша” — каньячныя й гарэлачныя бутэлькі, пляшкі для кетчупаў і пэпсі-колы — рэзка паменшаў, прадпрыемства вінаватае вялізныя сумы па банкаўскіх рахунках, крэдытах і за энэргарэсурсы. Адзін з крэдытораў зьвярнуўся ў гаспадарчы суд, і той абвясьціў ААТ банкрутам. Іншай працы ў пасёлку няма, і нават неабходныя 2/3 сярэдняга заробку крэдыторы адмаўляюцца выплачваць. Толькі ў жніўні выдаткавана 25 млн. рублёў, якія разьмеркавалі найперш паміж сем’ямі, чые дзеці павінны былі пайсьці ў школу.
На 22 кастрычніка прызначаныя таргі па продажы маёмасьці прадпрыемства.
Новая прадстаўніца МВФ
1 лістапада распачне працу новы прадстаўнік МВФ у Беларусі й Літве Зюзана Брыксіёва. Жыць З.Брыксіёва будзе ў Вільні. Нарадзілася яна ў Чэхаславакіі, займалася праблемамі эканомікі Блізкага Ўсходу. На стаўленьні МВФ да краіны гэтае прызначэньне не адаб’ецца.
“Санта” сэртыфікаваная
Першы ў Беларусі сэртыфікат адпаведнасьці міжнароднай сыстэме HACCP (Hazard Analysis and Critical Control Point) атрымала прадпрыемства “Санта-Брэмар”, што працуе ў вольнай эканамічнай зоне “Берасьце” і вырабляе прадукты харчаваньня. НАССР гарантуе якасьць прадуктаў і з 2004 г. зробіцца абавязковай у Эўропе.
“Гомсельмаш” — банкрут?
Абвясьціць “Гомсельмаш” банкрутам хоча санкт-пецярбурскае ТАА “Петракамплект”, якому гомельцы нібыта вінныя 2 млн. расейскіх рублёў за мэталапракат. Між тым, запазычанасьць калгасаў і саўгасаў самому “Гомсельмашу” складае 40 млн. рублёў. Заробкаў там не атрымлівалі са жніўня. Судзьдзя Сяргей Калодка вярнуў пазоў расейцаў на дапрацоўку: не былі ўлічаныя ўмовы беларускага Закону аб банкруцтве.
