У Нобэлеўскім інстытуце ў Осла адбылася ўрачыстая цырымонія ўзнагароджаньня прэміяй імя Герда Буцэрыюса. Сярод цяперашніх ляўрэатаў — беларуская газэта «Наша Ніва», беларускі моладзевы мультымэдыйны праект «СD‑mag», а таксама тры выданьні ад Расеі і Азэрбайджану.
Як паведамілі ў журы конкурсу, да якога належаць вядомыя нямецкія і нарвэскія журналісты ды грамадзкія дзеячы, уключна з дыпляматам Гансам‑Георгам Вікам, традыцыйна пераможцамі конкурсу становяцца лепшыя выданьні і журналісты Ўсходняй Эўропы. Сёлета на атрыманьне прэміі прэтэндавалі 48 кандыдатаў. Паводле журы, «усе ляўрэаты зьяўляюцца вельмі сьмелымі людзьмі, паколькі вымушаныя працаваць ва ўмовах жорсткага ціску з боку ўладаў»
У мінулыя гады пераможцамі ад Беларусі былі агенцтва БелаПАН, газэты «Народная Воля», «Свободные Новости», «Витебский курьер», «Белорусский рынок», «Брестский курьер», «Белорусская деловая газета», «Салідарнасьць», журналісты Сьвятлана Калінкіна, Мікола Маркевіч, Ася Трацюк.
