18 сьнежня 2003
Ліміт росту цэнаў вычарпаны
Урад і Нацбанк ня здолелі ўтрымаць інфляцыю нават у прагнозных рамках. За 11 месяцаў году цэны вырасьлі на 24%. Гэта болей, чым разьлічвалася на цэлы год. Беларусь — краіна з найвышэйшым узроўнем інфляцыі ва Ўсходняй Эўропе.
Валютныя запасы Беларусі растуць
На 1 лістапада памер чыстых актываў ураду і Нацбанку краіны складаў 500,6 млн даляраў, што на 4,5% болей проці пачатку году.
Рост цэнаў на дрэва й дровы
З 1 студзеня зраўняюцца цэны на дзелавую драўніну, прызначаную на экспарт, і драўніну дзеля ўнутранага карыстаньня. Увогуле кошт драўніны вырасьце ў паўтара разу. Фіксаваная цана складамэтра расьпілаваных дроваў павысіцца з 3,5 да 4,5 тыс. руб. Норма на адну хату — 7 складамэтраў. Звыш гэтага ліміту дровы прадаюцца па свабоднай цане.
Ультыматум Касьянава
Выступаючы ў Кіёта, расейскі прэм’ер Міхаіл Касьянаў публічна выставіў Беларусі ультыматум. Калі да 1 студзеня Расея й Беларусь не дасягнуць згоды па стварэньні газатранспартнай камапніі, з Новага году Беларусь будзе атрымліваць газ з Расеі па 50 даляраў за тысячу кубамэтраў.
Палічылася з «Балтыкай»
Пазыку «Балтыцы» ў 10,5 млн даляраў «Крыніца» выплаціла за два дні да разбору ў Краснадарскім арбітражным судзе ў справе арышту маёмасьці беларускага заводу. Расейскія інвэстары лічаць, што ім павінны выплаціць яшчэ й працэнты. Тым часам беларускаму ўраду пад націскам Масквы давялося скасаваць уласнае рашэньне аб спагнаньні ПДВ на транзыт расейскіх тавараў.
Даляр застанецца слабым проці эўра
Арышт Садама наўрад ці выкліча моцнае падзеньне цэнаў на нафту і рост курсу даляра, мяркуе большасьць экспэртаў. Рэзкі пералом сытуацыі можа адбыцца толькі ў тым выпадку, калі амэрыканцы знойдуць бэн Ладэна. Замежнагандлёвы дэфіцыт у ЗША застаецца рэкордна высокім. У кастрычніку ён склаў $41,77 млрд проці $41,34 млрд у верасьні.
Піва: у Нямеччыне меней, у нас болей
Паводле ацэнак аналітыкаў агенцтва «Fitch», рынак піва ў Заходняй Эўропе працягвае курчыцца. З усіх краінаў толькі ў Італіі і Гішпаніі продажы ў апошнія пяць гадоў расьлі. А ў Нямеччыне, напрыклад, яны зьмяншаліся на 1,5% за год. Тым часам ва Ўсходняй Эўропе, у тым ліку й Беларусі, спажываньне піва расьце на 5—10% у год, за кошт выцісканьня мацнейшых напояў.
МБ; БелаПАН
