Пратакол сакрэтнага паседжаньня праўленьня кампаніі «Луколгейт»
Дырэктар: Сядайце. Я сабраў вас, каб паведаміць, што не задаволены вашай работай. Як сьведчыць статыстыка, папулярнасьць нашай зубной пасты падае. Усё больш і больш учорашніх спажыўцоў аддаюць перавагу «Эўрадэнту». Аддзел продажаў, што там у вас? Якія захады прымаюцца?
Першы Мэнэджэр: Штотыдзень ствараюцца новыя рэклямныя ролікі, якія дэманструюцца ў найлепшы час — у нядзелю ўвечары на нашым Бяззубым Тэлеканале. Асаблівая ўвага ў іх надаецца разьвянчаньню...
Дырэктар: Рэкляма! Вы толькі й знаеце, што канкурэнтаў у брудзе тапіць! Крычыцё, што ад «Эўрадэнту 5+» бывае карыес. А між тым ходзяць чуткі, што паражонныя ім зубы здымалі з натуры ў роце аднаго з найвышэйшых мэнэджэраў нашай кампаніі... Дзе пазытыў? Дзе станоўчы вобраз «Луколгейту»?
Першы Мэнэджэр: ...
Дырэктар: Сэлектар адключаны, можаце мне вазражаць.
Першы Мэнэджэр: Галоўнае — упэўніць спажыўца, што астатнія яшчэ горшыя. І ён купіць нашу пасту! Ён жа да яе прывык. Так ужо было!
Дырэктар (уздыхае): Тым, што прывыклі, — між намі — усё адно. Яны парашком «Сталін-гейт» некалі зубы чысьцілі. А пасьля жалезныя ўставілі.
Мэнэджэр з дубовым лісьцікам на каўняры: А харошы быў парашок...
Дырэктар: Але многія яго інгрэдыенты маральна састарэлі. Нам трэба новыя распрацоўкі. Аддзел навукі?
Другі Мэнэджэр: Хутка патэнцыйны спажывец, у якога ныюць зубы ад Бяззубага Тэлеканалу, ня зможа ўцячы ад нашае рэклямы і на спадарожнікавай талерцы. Праўда, уласны спадарожнік пакуль ня можам запусьціць, таму будзем трансьлявацца праз арандаваны ў братняга канцэрну «Зубарос».
Поўны варыянт артыкулу чытайце ў папяровай і pdf-вэрсіі "Нашай Нівы"
Сяргей Мікулевіч