Прэзыдэнцкія выбары ва Ўкраіне падзялілі музычную супольнасьць на дзьве часткі.
Забаўляльныя мерапрыемствы з удзелам зорак шоў-бізнэсу — традыцыйны атрыбут любой выбарчай кампаніі. Калі ў Беларусі дазваляюць канцэрты толькі «за Беларусь», то ва Ўкраіне музыканты, няхай і зь перашкодамі, могуць засьведчыць сваю грамадзянскую пазыцыю. Зь верасьня па ўсёй краіне распачаліся шырокамаштабныя туры ў падтрымку як Януковіча (пад лёзунгам «Моладзь — супраць, моладзь — за», «Веру Януковічу»), так і Юшчанкі («Песьні свабоды», «Разам пераможам»), якія звычайна праходзяць на цэнтральных плошчах і ў вялізных спарткомплексах ды зьбіраюць да 100 тысяч гледачоў.
Януковіч зрабіў стаўку на папулярных артыстаў з Расеі. Своеасаблівым музычным кіраўніком перадвыбарнай кампаніі прэм’ер-міністра выступіў Іосіф Кабзон. Ён заявіў, што грошай у яго багата і канцэрты «за Януковіча» ён дае па сваіх ідэйных перакананьнях. Акрамя яго, Украіну пад гэтым слоганам аб’езьдзілі сталыя ўдзельнікі «Славянскага базару» — Лаліта, Надзея Бабкіна, Наташа Каралёва, Клара Новікава, Валеры Меладзэ. З расейскіх рок-гуртоў у агітацыі за Януковіча быў заўважаны «Сплін».
Украінскія мэгазоркі Верка Сярдзючка і Руслана ў агітацыйных турах заўважаны не былі, аднак на адным са сваіх сольных канцэртаў пераможца «Эўрабачаньня-2004» сьпела разам зь Януковічам савецкі шлягер «Калі вясна прыйдзе, ня ведаю», пасьля чаго ўзьнялася вялікая хваля абурэньня, асабліва ў Львове, адкуль Руслана родам. Так што сьпявачцы прыйшлося склікаць экстраную прэс-канфэрэнцыю, дзе яна заявіла, што знаходзіцца па-за палітыкай, у нічыіх агітмерапрыемствах удзелу браць ня будзе і нават пагразіла судом абодвум кандыдатам, калі тыя скарыстаюць ейнае імя ў сваіх кампаніях.
Януковіча таксама падтрымалі прадстаўнікі эстраднай тусоўкі, якія, паводле выразу Алега Скрыпкі, «і за Кучму гралі, і за чортаву маму будуць граць». Гэта Ані Лорак, Натальля Магілёўская, Віктар Паўлік. Сярод больш-менш вядомых за межамі краіны — Ірына Білык, група «Грын Грэй» ды «Скрабін». Выступ на акцыях «за Януковіча» апошніх выклікаў абурэньне ва ўкраінскіх музычных прыхільнікаў. Мяркуючы па паведамленьнях на ўкраінскіх інтэрнэт-форумах, лідэр групы Кузьма (той самы, які прасьпяваў з Вольскім песьню «Суседзі») пазбавіўся часткі сваіх прыхільнікаў: «Зарабляньне грошай на такіх акцыях — гэта продаж нашай дзяржавы…» — абураецца сталы прыхільнік «Скрабіна». Цікава, што ў гасьцёўні на афіцыйным сайце групы падобныя паведамленьні адразу ж выдаляюцца.
Поўнасьцю гэты артыкул можна прачытаць у папяровай і pdf-вэрсіі "Нашай Нівы"
Сяргей Будкін
