Выбары ў Кыргызстане і Таджыкістане, рэфэрэндум наконт праекту эўраканстытуцыі ў Гішпаніі, візавы скандал зь Ёшкам Фішэрам, прапанова Хосьні Мубарака выбіраць эгіпэцкага прэзыдэнта прамым галасаваньнем, кансультацыі ЭС—Украіна… З усяго вадаспаду навін мінулага тыдня беларускага назіральніка больш за ўсё цікавіла браціслаўская сустрэча Буша і Пуціна, дзе дзяржавы-мастадонты «дзялілі» постаранжавы сьвет. Прэсу аглядае Лёлік Ушкін.
Напярэдадні саміту ў газэтах было шмат спэкуляцый наконт абструкцыі, якую Буш паабяцаў учыніць Пуціну за аўтарытарызм у Расеі. Выданьне Паўлоўскага «Кремль.org» нават параіла Пуціну актывізаваць напярэдадні ваяжу беларуска-расейскі праект і прыехаць у сталіцу Славаччыны ў статусе прэзыдэнта саюзу Беларусі і Расеі. Аднак жахі патрыётаў аказаліся перабольшанымі.
Ня дзіўна, што расейская прэса задаволеная вынікамі Браціславы: «Известия» назвалі сустрэчу «эталёнам цывілізаваных адносінаў паміж краінамі». «Время новостей» лічыць, што Пуцін увогуле перамог у Браціславе, бо «насуперак шматлікім папярэднім абяцаньням Буша жорстка пакрытыкаваць Пуціна за праблемы з дэмакратыяй» прэса не пачула нічога падобнага.
Эўрапейскія камэнтатары асьцярожнічалі. Вугорская «Нэпсабатшаг»: «Амэрыка і Расея яшчэ ніколі не былі такія ўзаемна жорсткія, не гатовыя пайсьці на саступкі ў сваіх пазыцыях». Нямецкая «Зюддойчэ цайтунг» сьцвярджае, што публічныя дэклярацыі аб сяброўстве на брыфінгах не даюць поўнай карціны ўзаемаадносін прэзыдэнтаў: «Пакуль Буш і Пуцін на людзях дэкляруюць жаданьне мірнага суіснаваньня, нешта накшталт вайны адбываецца на заднім пляне».
Поўны варыянт чытайце ў папяровай і pdf-вэрсіі газэты "Наша Ніва"
