Усама (Osama)
Аўганістан—Нідэрлянды—Японія—Ірляндыя—Іран, каляровы, 83 хв.
Жанр: драма
Пад уладай талібаў удовам пагражае галодная сьмерць: паводле канонаў жанчынам нельга выходзіць на вуліцу без суправаджэньня мужоў. Каб здабыць хоць нейкія сродкі на пражыцьцё, маці пераапранае дачку ў хлопчыка Ўсаму. Але падман нельга доўга хаваць…
«Усама» — першая карціна, зьнятая ў Аўганістане пасьля падзеньня рэжыму фундамэнталістаў, якія разрабавалі кінатэатры й кінастудыю, зьнішчыўшы плёнкі й кінакамэры.
Рэжысэру Сыдніку Бармаку, выпускніку ВГІКу, дапамгаў іранец Махсэн Махмальбаф, які ўжо зьвяртаўся да тэмы Аўганістану ў сваёй карціне «Кандагар».
Бармак шукаў актораў у лягерах уцекачоў, а галоўную актрысу знайшоў сярод жабракоў.
Прызы Канаў, прэмія «Залаты глёбус».
Тэатар (Being Julia)
ЗША—Канада—Вугоршчына—Вялікабрытанія, каляровы, 2004, 105 хв.
Жанр: мэлядрама паводле раману Самэрсэта Моэма
Зорка Лёнданскага тэатру Джулія Ламбэрт знаходзіцца ў росквіце славы. Каб пазбыцца хандры й старасьці, яна кідаецца ў раман з маладым прайдзісьветам Томам (Шон Эванс), але ён аддае перавагу легкадумнай старлетцы. Помста зоркі будзе бліскучай і тэатральнай.
Рэжысэр карціны — вугорскі клясык Іштван Саба («Мэфістофэль», «Палкоўнік Рэдль»). Ролю Джуліі Ламбэрт выконвае Анэт Бэнінг, што стала знакамітай пасьля «Прыгажосьці па-амэрыканску».
Сярод іншых выканаўцаў — Джэрэмі Айранз («Лаліта», «Заручаныя насьмерць»), Мірыям Марголіс («Мадыльяні», «Гары Потэр і патаемны пакой»).
Машыніст (El Maquinista)
Гішпанія, 2004, каляровы, 102 хв.
Жанр: трылер
Трэвар Рэзьнік (Крысьціян Бэйл) ня сьпіць ужо год і пераўтварыўся ў жывы шкілет. Яму ўсё цяжэй адрозьніваць жыцьцё ад трызьненьняў. Але хто, насамрэч, ён такі?
Амэрыканец Брэд Андэрсан, які на свой праект знайшоў грошы ў Гішпаніі, наўмысна здымаў Барсэлёну як Лос-Анджэлес. «У выніку атрымаўся нейкі дзіўны паралельны сьвет», — кажа рэжысэр.
Крысьціяну Бэйлу, які сыграў «Амэрыканскага псыхапата», не прызвычайвацца да дзіўных рэчаіснасьцяў і паталёгій, але для гэтай карціны ён схуднеў болей чым на трыццаць кіляграмаў.
Амэрыканскія крытыкі назвалі «Машыніста» адным зь лепшых фільмаў 2004 году.