Міліцыя шукае жанчыну, якая паведаміла пра падрыхтоўку тэракту ў Мінску
Групы размініравання вайсковай часці 5448 унутраных войскаў і спецпадраздзялення па барацьбе з тэрарызмам «Алмаз» МУС Беларусі абследавалі раніцай 14 кастрычніка рынак «Заходні» ў Фрунзенскім раёне сталіцы.
Такія меры, як паведамілі ў аддзеле інфармацыі і грамадскіх сувязей ГУУС Мінгарвыканкама, былі прынята пасля тэлефанавання невядомай жанчыны на спецлінію 102.
Прыкладна ў 10.35 жанчына паведаміла, што з 12.30 да 13.00 на рынку «Заходні» адбудзецца тэрарыстычны акт. На просьбу аператара паведаміць свае даныя, жанчына адказала: «Не магу сябе назваць, баюся, што заб’юць». Пасля чаго павесіла трубку.
Адразу ж было ўстаноўлена, што невядомая тэлефанавала з таксафона, размешчанага на тэрыторыі рынку. Пасля эвакуацыі наведнікаў тэрыторыя была абследавана, аднак падазроных прадметаў знойдзена не было.
Цяпер праваахоўнікі ўстанаўліваюць асобу жанчыны.
ГУУС нагадвае, што ў адпаведнасці з артыкулам 400 КК за заведама непраўдзівы данос пра ўчыненне злачынства прадугледжана адказнасць аж да пазбаўлення волі тэрмінам да пяці гадоў.
Каментары