З вясны і да глыбокай восені злодзей змудрыўся скрасці больш за 50 ровараў, якія стаялі каля крамаў ды іншых гандлёвых кропак.
Практычна на канвеер паставіў 27‑гадовы мінчук крадзяжы ровараў. З вясны і да глыбокай восені злодзей змудрыўся скрасці больш за 50 ровараў, якія стаялі каля крамаў ды іншых гандлёвых кропак.
Спосаб крадзяжу зламыснік вынайшаў арыгінальны. На «справу» ён браў заплечнік і кусачкі. Каля гандлёвых цэнтраў ён прыкмячаў дарагія ровары, пасля гэтага па‑гаспадарску падыходзіў да іх, прысаджваўся побач, перасоўваў заплечнік са спіны на плячо, прасоўваў у яго руку, браў кусачкі і праз загадзя прарэзаную на дне заплечніка адтуліну зразаў замок, з дапамогай якога ровар быў прышпілены на стаянцы. Пасля гэтага праз тую ж адтуліну ён уцягваў у заплечнік замок і ад’язджаў на чужым ровары, піша газета «Вечерний Минск».
Разлік быў вельмі дакладны, бо мінакі ў яго руках кусачак не бачылі, замка, адпаведна, таксама.
Усё выглядала законна: прыйшоў гаспадар, завязаў шнуркі і паехаў дадому.
Няўлоўнага злачынцу неаднаразова фіксавалі відэакамеры гандлёвых цэнтраў і крам, але вызначыць яго асобу было цяжка.
Урэшце міліцыянты выйшлі на след злодзея і затрымалі з крадзеным. Дарэчы, мінчук не тоячыся назваў усе месцы, адкуль краў ровары. Прадаваў скрадзенае ён каля рынкаў за 150‑200 тысяч рублёў, а атрыманыя грошы выдаткоўваў на кавярні і рэстараны.
Цяпер чытаюць
Каментары