У Заводскім раёне затрымалі злачынцаў, якія кралі пенсіі
Следчым аддзяленнем папярэдняга расследавання Заводскага РУУС Мінска распачата справа па ч. 2 арт. 209 Крымінальнага кодэкса (махлярства) у дачыненні да групы маладых людзей, якія на працягу некалькіх месяцаў выкрадалі грошы састарэлых людзей пасля атрымання імі пенсій.
Як паведамілі ў ГУУС Мінгарвыканкама, на вачах у састарэлага чалавека з зямлі падымаўся нібыта згублены кімсьці кашалёк. Далей адзін з махляроў прапаноўваў пенсіянеру раздзяліць здабычу, у гэты момант з’яўляўся яго саўдзельнік. Затым сутнасць дзеянняў зводзілася да таго, каб вымусіць састарэлага чалавека перадаць свае грошы нібыта для пераліку, падчас якога частка купюр «заломвалася» і заставалася ў руцэ злачынца.
Толькі з пачатку гэтага года ў Заводскае РУУС звярнуліся пяцёра пацярпелых. Два злачынцы ўжо апазнаныя. Цяпер правяраецца дачыненне затрыманых да аналагічных злачынстваў, учыненых у іншых раёнах горада.
Каментары