Навіна аб магчымым пахаванні Качынскіх на Вавелі выклікала спрэчкі ў польскім грамадстве.
Паспешлівае рашэнне, менавіта пад такім загалоўкам «Gazeta Wyborcza» змясціла на сваёй інтэрнэт-старонцы матэрыял, прысвечаны рашэнню змясціць целы Леха і Марыі Качынскіх у саборы Вавельскага замка – гістарычнага цэнтра Польшчы.Такое рашэнне прыняла сям’я трагічна загінулай пары – брат Леха Качынскага Яраслаў і дачка Марта.
Калі гэта адбудзецца, а падобна, што рашэнне ўжо прынятае канчаткова, Лех Качынскі стане першым прэзідэнтам, пахаваным на Вавелі. Там знайшлі спачын такія важныя для гісторыі Польшчы асобы, як Уладзіслаў Ягайла, Казімір Вялікі, Сцяпан Батура, Тадэуш Касцюшка, Адам Міцкевіч і інш.
На форумах польскіх інтэрнэт-выданняў навіна аб магчымым пахаванні Качынскіх на Вавелі выклікала актыўнае аберкаванне.
«Краіна была аб’яднанай толькі тры з паловай дні» – такая асноўная думка каментароў.
Падобным быў і змест ліста Анджэя Вайды, з якім ён звярнуўся да палякаў.
Тая ж «Gazeta Wyborcza» адзначае ў сваім артыкуле, што «Іх значэнне (асобаў, што знайшлі спачын на Вавелі) для нашай гісторыі і культуры падцвердзіла шмат пакаленняў палякаў. Рашэнне, паводле якога Лех Качынскі пасля смерці будзе суседнічаць з Пілсудскім, творцам незалежнасці Польшчы, неадпаведнае».
Іншае папулярнае польскае выданне – «Rzeczpospolita» – у паведамленнях аб планах пахавання Леха Качынскага не змяшчае крытычных каментароў.
Сацыяльныя сеткі і блогі запоўніліся допісамі, у якіх аўтары выступаюць супраць пахавання Качынскіх у Кракаве. Польскія інтэрнаўты называюць яго перабольшваннем і каментуюць як непрымальнае.
Наколькі абгрунтаванае такое рашэнне? Безумоўна, нягледзячы на трагічную смерць, Леха Качынскага нельга паставіць у адзін шэраг з тымі, хто ўжо пахаваны на Вавелі. Рашэнне зрабіць такі крок хутчэй эмацыйнае. Аднак падобна на тое, што мала хто зараз у Польшчы можа запярэчыць брату загінулага прэзідэнта, Яраславу.
Цяпер чытаюць
«Нейкая Ліза, якой 20 гадоў, судзіцца з Лукашэнкам» — вялікая гутарка з новай віцэ-спікеркай КР Лізаветай Пракопчык13
Каментары