Большасць кіраўнікоў дзяржаў АДКБ на нефармальным саміце арганізацыі 8 мая станоўча ацанілі рашэнне Аляксандра Лукашэнкі прыняць на сваёй тэрыторыі Курманбека Бакіева.
Пра гэта паведаміў на прэс‑канферэнцыі ў Маскве 14 мая генеральны сакратар АДКБ Мікалай Бардзюжа.
«Амаль усе падтрымалі і сказалі пра тое, што прэзідэнт Беларусі зрабіў проста па‑мужчынску і высакародна, аказаўшы садзеянне, па‑першае, самому Курманбеку Саліевічу, па‑другое, яго найбліжэйшым родным», — цытуе Бардзюжу РІА Новости.
Адказваючы на пытанне пра тое, «ці не паўплывае асаблівая пазіцыя Лукашэнкі» на адносіны да Беларусі ў рамках АДКБ, Бардзюжа сказаў: «Я не бачу ніякай асаблівай пазіцыі Беларусі. Прэзідэнт Беларусі сказаў тое, што пацвердзілі астатнія кіраўнікі дзяржаў, — тое, што ў Кыргызстане прайшла нелегітымная, неканстытуцыйная змена ўлады. Гэта суверэнная справа Беларусі, але гэта не асаблівая пазіцыя ў дачыненні, напрыклад, да АДКБ ці да іншых кіраўнікоў дзяржаў, якія выказваліся інакш». Нагадаем, 11 мая ў Мінску Аляксандр Лукашэнка заявіў, што краіны АДКБ падтрымалі пазіцыю Беларусі па сітуацыі ў Кыргызстане і дадзены факт адзначаны ў сумесным дакуменце, які падпісаны па выніках саміта АДКБ 8 мая ў Маскве. «Гэта не толькі пазіцыя Лукашэнкі. Усе кіраўнікі дзяржаў падпісалі дакумент, у якім заявілі, што ў Кыргызстане быў дзяржаўны пераварот, аб чым я і гаварыў у першыя ж дні», — заявіў прэзідэнт.
Пры гэтым ён падкрэсліў: «Усе без выключэння прызналі, што беларускі прэзідэнт у дадзенай сітуацыі паступіў правільна».
Курманбек Бакіеў прыбыў у Беларусь 19 красавіка. Часовы ўрад Кыргызстана дабіваецца яго выдачы. 4 мая кіраўнік часовага ўрада Кыргызстана Роза Атунбаева падпісала дэкрэт аб пазбаўленні Бакіева прэзідэнцкай недатыкальнасці на падставе крымінальнай справы, паводле якой скінуты лідэр абвінавачваецца ў арганізацыі забойстваў і злоўжыванні службовым становішчам.
У той жа дзень прэзідэнт Беларусі заявіў, што не збіраецца выдаваць Бакіева новым уладам Кыргызстана. «Да мяне ніхто афіцыйна не звяртаўся, — сказаў Лукашэнка. — Але адразу хачу афіцыйна заявіць: гэтыя звароты будуць бескарысныя і зневажальныя для часовага ўрада. Прэзідэнт Кыргызстана знаходзіцца пад абаронай беларускай дзяржавы і прэзідэнта. Не трэба так званаму часоваму ўраду звяртацца з патрабаваннем выдаць Бакіева. Каму выдаць? Ці захачу я яшчэ размаўляць з тымі, хто сёння кіруе ў Кіргізіі».
11 мая ў Генеральнай пракуратуры Беларусі пацвердзілі, што да іх паступіў запыт аб выдачы Бакіева.
Каля будынку беларускага пасольства ў Бішкеку у гэты час праходзілі рэгулярныя пікеты з патрабаваннем выдаць Курманбека Бакіева новым уладам. 13 мая супрацоўнікі пасольства пакінулі Кыргызстан з‑за меркаванняў бяспекі.
Васкрасенскі: Адкрываецца неба — і Алесь Бяляцкі адразу выходзіць31
Каментары