У Мінск з двухдзённым візітам прыбыў прэм’ер‑міністр Казахстана
Вечарам 19 мая ў Мінск з двухдзённым візітам прыбыў прэм’ер‑міністр Казахстана Карым Масімаў.
Паводле інфармацыі сайта ўрада Казахстана, Масімава суправаджаюць міністр па надзвычайных сітуацыях Уладзімір Бажко, першы намеснік міністра індустрыі і новых тэхналогій Альберт Рау, кіраўнік кампаніі «Казахтэлекам» Куанышбек Есекееў, першы намеснік міністра замежных спраў Нуртай Абыкаеў, старшыня кіраўніцтва Фонду нацыянальнага дабрабыту «Самрук‑Казына» Кайрат Келімбетаў.
20 мая Масімаў азнаёміцца з працай Нацыянальнай бібліятэкі, сустрэнецца з прэм’ер‑міністрам Сяргеем Сідорскім (у пашыраным складзе), а таксама возьме ўдзел у пленарным пасяджэнні казахстанска‑беларускага дзелавога форуму, паводле вынікаў якога запланаваны сумесны выхад да прэсы.
На форуме будзе абмяркоўвацца шэраг прапанаваных беларускім бокам эканамічных праектаў, якія ўключаны ў Карту індустрыялізацыі Казахстана і адлюстроўваць важныя кірункі двухбаковага супрацоўніцтва ў гандлёва‑эканамічнай, паліўна‑энергетычнай, машынабудаўнічай, аграпрамысловай, касмічнай і гуманітарнай сферах.
У форуме, як чакаецца, возьмуць удзел больш за 130 прадстаўнікоў дзелавых колаў Казахстана.
Паводле звестак беларускага МЗС, у агульным аб’ёме знешняга гандлю Беларусі з краінамі СНД Казахстан займае трэцяе месца пасля Расіі і Украіны.
У 2009 годзе тавараабарот паміж Беларуссю і Казахстанам склаў 388,3 млн. даляраў (знізіўся на 27,7% у адносінах да 2008 года), экспарт — 313,4 млн., імпарт — 74,9 млн. Сальда станоўчае — 238,5 млн. даляраў.
У студзені—сакавіку 2010 года ў параўнанні з аналагічным леташнім перыядам тавараабарот павялічыўся на 40,6% да 106,7 млн. даляраў, экспарт — на 56,5% да 91,8 млн., імпарт — скараціўся на 13,5% да 14,9 млн. Сальда станоўчае — 76,9 млн. даляраў.
Аснову беларускага экспарту складаюць пастаўкі цукру, шын, малочнай прадукцыі, трактароў, лекавых сродкаў, бытавой апаратуры і тэхнікі (халадзільнікі, маразільнікі і халадзільнае абсталяванне, пральныя машыны), сельскагаспадарчай і аўтамабільнай тэхнікі, мэблі.
Казахстан пастаўляе ў Беларусь пракат плоскі з вугляродзістай і легіраванай сталі, солі фосфарных кіслот, стужкі канвеерныя, ферасплавы, алюміній і цынк, падшыпнікі.
Цяпер чытаюць
На вайне ва Украіне загінуў былы дырэктар двух аршанскіх заводаў4
Каментары