Сярэдняя дапамога па беспрацоўі ў Мінску — 45 тысяч 600 рублёў
Афіцыйны ўзровень беспрацоўя ў Мінску на 1 чэрвеня 2010 года склаў 0,4% эканамічна актыўнага насельніцтва.
За май гэты паказчык не змяніўся, паведамілі ва ўпраўленні занятасці камітэта па працы, занятасці і сацыяльнай абароне Мінгарвыканкама.
Сярэдні памер дапамогі па беспрацоўі ў маі складаў 45,6 тыс. рублёў (у красавіку — 44,9 тыс. рублёў).
У службах занятасці на 1 чэрвеня былі зарэгістраваны 4.292 беспрацоўныя. У маі за садзейнічаннем у працаўладкаванні звярнуліся больш як 9.900 чалавек.
На пастаянную ці часовую працу ўладкаваны 4.413 беспрацоўных, з іх 3.089 — атрымалі пастаянную працу.
На часовую працу ў вольны ад вучобы час працаўладкаваны 671 студэнт і школьнік. На прафесійную падрыхтоўку, перападрыхтоўку і павышэнне кваліфікацыі накіравана 1.108 беспрацоўных. У грамадскіх работах удзельнічалі 1.287 чалавек, у тым ліку 1.131 беспрацоўны.
Колькасць заяўленых вакансій на прадпрыемствах сталіцы на пачатак лета склала 15.991, у тым ліку для рабочых — 12.508.
Пры пошуку працы да камп’ютэрных інфарматараў звярнуліся больш за 157 тыс. чалавек, анкету‑рэзюмэ запоўнілі 1.454.
Найбольш запатрабаванымі спецыялістамі ў Мінску з’яўляюцца вадзіцелі аўтамабіляў, электрыкі‑электраманцёры, грузчыкі, прыбіральшчыкі, медсёстры, санітары, урачы‑тэрапеўты, міліцыянеры, вадзіцелі аўтобуса, бетоншчыкі, муляры, выхавальнікі, кандуктары, краўцы‑швачкі, афіцыянты, начальнікі аддзелаў кампаній, кандытары.
Цяпер чытаюць
«Быў упэўнены, што я недатыкальная асоба для расіян». Першае інтэрв'ю Юрася Зянковіча на свабодзе24
Каментары