Байкову перавялі пад хатні арышт

Пасля ўчарашняй сустрэчы з Лукашэнкам Генпракурор адмовіўся працягваць тэрмін утрымання пад вартай. Следчы Генпракуратуры Святлана Байкова, затрыманая 25 лютага, пераведзена пад хатні арышт, паведаміў яе адвакат Міхаіл Волчак.

«Генеральным пракурорам Рэспублікі Беларусь адмоўлена ў працягу тэрміну ўтрымання пад вартай Байковай С. А. Цяпер яна знаходзіцца дома: следствам абрана мера стрымання — хатні арышт.

Байкова была арыштавана раніцай 25 лютага на працоўным месцы па падазрэнні ў перавышэнні ўлады.

У канцы красавіка, пасля заканчэння двух месяцаў з моманту яе затрымання, генпракурор Рыгор Васілевіч адмовіўся працягваць тэрмін утрымання сваёй падначаленай. Пасля гэтага КДБ распачаў у дачыненні да Байковай другую крымінальную справу, тэрмін расследавання якой завяршаўся 24 чэрвеня.

У дачыненні да Байковай распачатыя справы па арт. 399 (незаконнае вызваленне ад крымінальнай адказнасці) і арт. 426 (перавышэнне ўлады або службовых паўнамоцтваў) Крымінальнага кодэкса. Увесь гэты час следчы знаходзілася ў следчым ізалятары КДБ.

31 мая Байкова аб'явіла галадоўку ў знак пратэсту супраць вылучаных ёй абвінавачанняў, з якой выйшла 16 чэрвеня па настаянні дактароў, сваякоў і абароны.

11 чэрвеня ў Адміністрацыю прэзідэнта Беларусі было перададзена прашэнне Байковай на імя Аляксандра Лукашэнкі. У ім затрыманая прасіла аднавіць яе парушаныя правы і свабоды, вызваліць са следчага ізалятара КДБ і дазволіць прадоўжыць працу.

Аднак 24 чэрвеня генпракурор працягнуў тэрмін утрымання Байковай пад вартай яшчэ на два месяцы.

У пачатку жніўня стала вядома, што Байкова знаходзіцца ў крытычным стане, у яе развілася нырачная недастатковасць, у сувязі з чым затрыманая праходзіла абследаванне ў шпіталі КДБ.

Трэба адзначыць, што 24 жніўня, у дзень, калі мусіў рашацца далейшы лёс Байковай, Аляксандр Лукашэнка прыняў з дакладам Рыгора Васілевіча. Як паведаміла прэс-служба прэзідэнта, Лукашэнка заявіў пра неабходнасць больш узважана падыходзіць да прызначэння пакаранняў, звязаных з пазбаўленнем волі.

У фільме НТВ «Хросны бацька» былы начальнік Упраўлення МУС па барацьбе з карупцыяй капітан Вячаслаў Дудкін, які змушаны быў уцячы з краіны пасля таго як былі спынены расследаванні карупцыйных злачынстваў з удзелам найвышэйшых чыноўнікаў, выказвае меркаванне, што Байкову арыштавалі, бо яна ў сваім расследаванні выйшла на структуры, блізкія да некаторых найвышэйшых кіраўнікоў краіны або іхных сямейнікаў.

• 0
• 0
• 0
• 0
• 0
• 0
• 0
• 0