Боль у спіне

 — з ім рана ці позна сутыкаюцца ўсе. Праўда, да першых прыкмет немачы многія ставяцца занадта бестурботна: маўляў, пабаліць — і перастане. Між тым, болі ў спіне з’яўляюцца па зусім розных прычынах, у тым ліку — як сімптом сур’ёзнага захворвання.

Перш за ўсё, спіна можа балець з-за пазваночніка, асабліва калі ў вас сядзячая праца і адсутнічаюць фізічныя нагрузкі. Болі часта з’яўляюцца ў тых, хто па некалькі гадзін на дзень праводзіць за камп’ютарам або падоўгу стаіць на нагах. Калі не прымаць мераў, вашы мышцы могуць атрафіравацца, а з часам адбудзецца зрушэнне пазванкоў і зашчамленне карэньчыкаў спіннога мозга. І тады болі ў спіне стануць рэзкімі і нясцерпнымі. Часам гэта прыводзіць нават да частковай непрацаздольнасці, паколькі некаторыя віды работ чалавек ужо не можа выконваць.

Калі ваша праца звязаная з неабходнасцю доўга сядзець або стаяць на адным месцы, для прафілактыкі атрафіі пазваночніка старайцеся кожныя паўгадзіны выконваць размінку: прайдзіцеся па пакоі, а яшчэ лепш — зрабіце некалькі простых практыкаванняў для пазваночніка (нахілы наперад і ў бакі, прагін назад). Іх карысна выконваць штодня на працягу 10–15 хвілін.

Вам даводзіцца доўга стаяць? Старайцеся раўнамерна размяркоўваць вагу цела на абедзве нагі або, прынамсі, пераступаць з нагі на нагу. Калі падымаеце прадмет з падлогі, трымайце спіну прама. Пры пераносе цяжараў часцей спыняйцеся і перакладайце груз з адной рукі ў другую. Таксама не варта насіць абутак з абцасам вышэй за 4 см. Звярніце ўвагу на ваш ложак — медыкі нездарма раяць спаць на цвёрдай паверхні. Падчас сну на вельмі мяккім матрацы ваш пазваночнік можа моцна прагінацца, што выклікае нагрузку на мышцы. Спачатку спіна за ноч стамляецца, а потым пачынае балець.

Боль у вобласці спіны можа паказваць і на няправільнае харчаванне. Так, недахоп мінеральных рэчываў — кальцыю, фосфару, калію і магнію — вядзе да астэапарозу, які робіць косці крохкімі. Таму ў рацыён неабходна рэгулярна ўключаць тлусты тварог, капусту, моркву, фасолю, гарох, рыс, буракі, грэцкія арэхі і фундук. А вось ужывання ў ежу белага цукру, наадварот, варта пазбягаць: яго засваенне арганізмам патрабуе расходу карысных рэчываў і аслабляе пазваночнік.

Таксама варта памятаць, што далёка не заўсёды болевыя адчуванні ў спіне азначаюць праблемы менавіта з ёю — яны могуць быць звязаныя і з унутранымі органамі. Напрыклад, у левую частку спіны можа аддаваць сардэчны боль, а сімптомам неладоў з жоўцевым пузыром можа быць ныючы боль у правай частцы спіны.

• 0
• 0
• 0
• 0
• 0
• 0
• 0
• 0