«Пабудуем новае, захаваем найлепшае»

30 лістапада ў дзяржаўных СМІ, у прыватнасці ў газеце «Минский курьер», апублікавана перадвыбарная праграма кандыдата ў прэзідэнты Беларусі Яраслава Раманчука.

Палітык пералічвае пяць каштоўнасцяў, якія «фарміруюць моцны фундамент» яго праграмы:

— свабода выбару кожнага чалавека;

— адказнасць кожнага чыноўніка;

— падтрымка кожнага чалавека ў бядзе;

— салідарнасць нацыянальных вытворцаў і спажыўцоў;

— партнёрства бізнесу і ўлады, грамадзянскай супольнасці і дзяржавы.

Сярод прыярытэтаў стварэння «новай Беларусі» Раманчук называе:

— вялікае грамадства. «Гэта актыўны ўдзел грамадзян у прыняцці рашэнняў палітыкамі і чыноўнікамі. Вялікае грамадства — гэта клопат аб здароўі чалавека і праяўленне салідарнасці з сацыяльна неабароненымі. Усе палітыкі ва ўладзе будуць выбірацца, а не прызначацца. 70% дзяржаўнага бюджэту будзе траціцца на мясцовым узроўні. Кампаніі, якія фінансуюць грамадскія арганізацыі, атрымаюць падатковыя льготы. Будзе ліквідавана цэнзура СМІ, гарантавана свабода слова і суверэнітэт інтэрнэта»;

— сумленная дзяржава. «На працягу года пасля прэзідэнцкіх выбараў мы правядзем канстытуцыйны рэферэндум. У Беларусі будзе абраны паўнацэнны парламент, гарантавана незалежнасць і эфектыўнасць суда. Кіраўнікі гарадоў і раёнаў будуць абірацца, а не прызначацца. Дэмакратычныя выбары ў парламент і ўсе мясцовыя органы ўлады пройдуць вясной 2012 года. СМІ стануць паўнацэннай чацвёртай уладай. Усе органы дзяржавы выйдуць са складу заснавальнікаў камерцыйных арганізацый. Дзяржаўнай маёмасцю будзе кіраваць Міністэрства па дзяржаўнай маёмасці і прыватызацыі. Будзе ўведзена забарона на заснаванне органамі дзяржкіравання новых камерцыйных структур»;

— прыватная эканоміка. «Беларусь стане адным з лепшых месцаў для прадпрымальніцтва ў Еўропе. На першым этапе стаўка ПДК будзе зніжана да 15%. Будзе ўведзена адзіная мытная пошліна на ўсе імпартныя тавары ў памеры 3%. У новым законе аб бюджэце замест 30 падаткаў і збораў у краіне будуць толькі тры: падатак з рознічных продажаў тавараў і паслуг (20%), адзіны сацыяльны падатак (15%) і акцызы. Падатковыя зборы не будуць перавышаць 30% ВУП. За кошт спрашчэння сістэмы справаздачнасці на руках у бізнесу кожны год будуць заставацца больш за 3 млрд. долараў»;

— новыя працоўныя месцы. «За 2011–2013 гады ў Беларусі будзе створаны мільён новых працоўных месцаў. Яны будуць стварацца беларускімі прадпрымальнікамі, малым бізнесам у партнёрстве з замежнымі інвестарамі. Да 2014 года ў краіну будзе прыцягнута да 20 млрд. долараў прамых замежных інвестыцый. З ценявой эканомікі выйдуць каля 8 млрд. долараў. Грошы на рэформы з’явяцца таксама за кошт уключэння ў камерцыйны абарот зямлі, разняволення прадпрымальнікаў і творчага патэнцыялу беларусаў»;

— адкрытая краіна. «Галоўны прынцып новай знешняй палітыкі Беларусі — „Сябраваць з усімі!“ Мы адновім добрасуседскія, партнёрскія адносіны з Расіяй. Будзе створана паўнацэнная зона свабоднага гандлю. Дзяржаўная мяжа перастане быць кармушкай для кантрабандыстаў і алігархаў. Мы захаваем бязвізавы рэжым з Расіяй, актывізуем інвестыцыйныя і гандлёвыя сувязі. Будзе створана паўнацэнная зона свабоднага гандлю з Украінай. Да 2013 года Беларусь выканае ўсе патрабаванні Сусветнай гандлёвай арганізацыі (СГА) і стане яе членам. У 2011 годзе мы ўвядзем мараторый на смяротную кару. Наша краіна стане членам Савета Еўропы. Да 2013 года Беларусь атрымае ад Еўрапейскага саюза статус краіны з рыначнай эканомікай і створыць з ЕС зону свабоднага гандлю. У 2011 годзе мы адменім візы для грамадзян краін ЕС, ЗША, Канады, Японіі і Паўднёвай Карэі. Беларусь рэалізуе дагаворы аб бязвізавым прыгранічным перамяшчэнні грамадзян з Літвой і Польшчай».

Апрача таго, Раманчук абяцае мадэрнізаваць сістэму адукацыі ў адпаведнасці са стандартамі Балонскага працэсу і, як вынік гэтага, прызнанне беларускіх дыпломаў у Еўропе.

У Беларусі будзе развівацца сучаснае інфармацыйнае грамадства. «Мы забяспечым высакахуткасны доступ да інтэрнэта ў кожную школу, універсітэт і бібліятэку. У сярэдняй школе будуць вывучацца дзве замежныя мовы. Беларуская нацыянальная культура ўзбагаціць еўрапейскую і стане яе неад’емнай часткай», — зазначаецца ў праграме.

• 0
• 0
• 0
• 0
• 0
• 0
• 0
• 0