Колькі нам каштуе прэзідэнт? $400 мільёнаў у год!

Кіраўніцтва справаў, Служба бяспекі, Рэзервовы фонд. «Наша Ніва» падлічыла афіцыйны бюджэт розных прэзідэнцкіх структур.

Выдаткі на дзяржаўныя органы, якія забяспечваюць дзейнасць прэзідэнта, мільярдаў рублёў

(у дужках — эквівалент у далярах)

2011 — 41,1 ($13 млн)
2010 — 30 ($10 млн)
2009 — 34,4 ($12 млн)
2008 — 26,4 ($12 млн)
2007 — 26,6 ($12 млн)

* * *

Адлічэнні з бюджэту ў рэзервовы прэзідэнцкі фонд, мільярдаў рублёў

у дужках — эквівалент у далярах

2011 — 270 ($90 млн)
2010 — 2760 ($919 млн)
2009 — 324 ($114 млн)
2008 — 217 ($99 млн)
2007 — 176 ($80 млн)

* * *

Адлічэнні на дзейнасць Кіраўніцтва справаў прэзідэнта, мільярдаў рублёў

у дужках — эквівалент у далярах

2011 — 405 ($128 млн)
2010 — 245 ($82 млн)
2009 — 284 ($100 млн)
2008 — 178 ($81 млн)
2007 — 133 ($61 млн)

* * *

Афіцыйныя даходы кіраўніка дзяржавы становяцца вядомыя беларусам толькі калі трапляюць у дэкларацыі аб даходах кандыдатаў у прэзідэнты. Папярэдні раз такая інфармацыя была ў 2005 годзе. Тады кіраўнік дзяржавы зарабіў за год 59 мільёнаў рублёў. У эквіваленце гэта складала каля 20 тысяч еўра.

Цяпер Лукашэнка зарабляе 94,5 мільёна рублёў — каля 24 тысяч еўра.

Але выдаткі краіны на прэзідэнта — гэта не толькі ягоны афіцыйны заробак.

Абслугоўванне прэзідэнта вымагае шмат дадатковых стратаў, і некаторыя з іх прапісваюцца ў бюджэце. Якія менавіта?

Першым радком у раздзеле «Агульнадзяржаўная дзейнасць» бюджэту краіны ідуць выдаткі на «дзяржаўныя органы, якія забяспечваюць дзейнасць прэзідэнта». З года ў год гэтая лічба вагаецца ў раёне $12 мільёнаў. Выключэннем-рэкардсменам стане толькі наступны год. Дзейнасць прэзідэнта «падаражае» ажно на 37% у параўнанні з леташнім паказчыкам. У сярэднім, усе працаздольныя беларусы вымушаны «скідвацца» па $2.

Загадкавы фонд

Адлічэнні ў загадкавы Рэзервавы фонд прэзідэнта нашмат большыя.

У гэтым годзе кожны працаздольны беларус падзяліўся з кіраўніком дзяржавы заробленымі $156.

Вядома, што існуюць два іншыя фонды — для дапамогі юрасобам і індывідуальным прадпрымальнікам і для фінансавання расходаў, звязаных са стыхійнымі бедствамі і катастрофамі. Што датычыць прэзідэнцкага фонду, то тут грошы ідуць на падтрымку таленавітай моладзі — выплату павышаных стыпендый, арганізацыю адукацыйных і забаўляльных мерапрыемстваў.

«Існаванне прэзідэнцкага фонду, які напаўняецца з бюджэту, а ягоныя грошы размяркоўваюцца прэзідэнтам, — гэта агульная практыка. Такія фонды існуюць у многіх краінах. Напрыклад, у Казахстане 300 студэнтаў атрымліваюць грошы з рук Назарбаева. Усё адно, ці будуць сродкі ісці напрасткі з бюджэту, ці выдавацца з рук прэзідэнта. Іншае пытанне, што ўсе ведаюць пра існаванне прэзідэнцкага фонду, але калі там была апошняя рэвізія і ці былі яны ўвогуле — ніхто не ведае», — кажа незалежны эканаміст Леанід Злотнікаў.

Колькі нам каштуе прэзідэнт? Дадамо, фінансаванне будоўляў, прэмій і стыпендый з прэзідэнцкага фонду актыўна выкарыстоўваецца ў прапагандзе. Так,

нібы гэта не грамадства фінансуе, а асабіста палітык Аляксандр Лукашэнка.

Звычайна адлічэнні з бюджэту складаюць каля $100 мільёнаў штогод. Выключэннем стаў гэты год, калі ў выніку пераразмеркавання бюджэту выдаткі на рэзервовы фонд перавысілі $900 мільёнаў!

Нягледзячы на дэфіцыт бюджэту, кіраўнік дзяржавы вырашыў не змяншаць выдаткі на сацыяльная праграмы, даплаціўшы з «уласнай» кішэні. Вось толькі гэтыя грошы былі кампенсаваныя да канца года. Агульная сума, што ўтрымліваецца ў рэзервовым фондзе прэзідэнта, невядомая. Па ўскосных сведчаннях, у сярэдзіне года яна складала каля $2,8 мільярда.

Прэзідэнцкія заўхозы

Кіраўніцтва справаў прэзідэнта, у адрозненне ад рэзервавага фонду, не «пазычае» грошай дзяржаўнаму бюджэту. Таму сярэднія выдаткі на гэтую ўстанову складалі за апошнюю пяцігодку «ўсяго» $90 мільёнаў.

Выхад з крызіснага 2010 года прадугледжвае, што выдаткі на імперыю прэзідэнцкіх заўхозаў узрастуць больш чым на палову — да $128 мільёнаў. Варта адразу ўдакладніць, што прыведзеныя выдаткі ніяк не пераклікаюцца з забеспячэннем дзейнасці прэзідэнта, бо праходзяць па рознай ведамаснай класіфікацыі.

Кіраўніцтва — гэта камерцыйная структура. І няясна, чаму кожны з нас вымушаны яе так шчодра фінансаваць з уласнай кішэні.

Бяспека даражэйшая за дзейнасць

Яшчэ некалькі устаноў маюць да кіраўніка краіны ўскоснае дачыненне. Яднае іх яшчэ адзін факт — усе яны ў 2011 годзе істотна падаражаюць. Напрыклад, Акадэмія кіравання каштавала сёлета $3 мільёны, а ў наступным годзе пацягне на ўсе $3,8 мільёна.

Аператыўна-аналітычны цэнтр пры прэзідэнце падрасце з $4,2 мільёна да $5,4 мільёна.

Трэцяя арганізацыя,

Служба бяспекі прэзідэнта, замахваецца на лічбы іншага кшталту. У гэтым годзе яна каштавала амаль столькі ж, колькі «забеспячэнне дзейнасці» кіраўніка дзяржавы — $10,2 мільёна.

Калі падлічыць, колькі бюджэтных грошаў давялося выдаткаваць на дзейнасць прэзідэнта, службу ягонай бяспекі, кіраўніцтва справамі і рэзервовы фонд, за пяць гадоў атрымаецца $1,9 мільярда! У сярэднім — $400 мільёнаў штогод. Сапраўды, прэзідэнт — дарагая забаўка.

• 0
• 0
• 0
• 0
• 0
• 0
• 0
• 0