Пахаванне членаў экіпажа МІ-24 адбудзецца ў пятніцу

Пахаванне членаў экіпажа Мі-24 адбудзецца 2 снежня ў вёсцы Новыя Засімавічы Пружанскага раёна, дзе знаходзіцца 181-я баявая верталётная база ВПС і войскаў СПА Беларусі.

Ваенны верталёт разбіўся каля 19.45 пры заходзе на пасадку ў раёне аэрадрома Пружаны пасля выканання планавых вучэбна-трэніровачных палётаў. Катастрофа адбылася прыкладна за паўтара кіламетры ад аэрадрома. Усе тры члены экіпажа баявой машыны загінулі. Гэта камандзір Алег Кахно (1973 г.н.), штурман Дзяніс Глушчанка (1979 г.н.), бортінжынер Валерый Бабко (1968 г.н.).

На месцы крушэння верталёта працуе камісія Міністэрства абароны. Брэсцкім міжгарнізонным ваенным пракурорам распачата справа на падставе ч. 2 арт. 465 КК (парушэнне правілаў палётаў або падрыхтоўкі да іх або іншых правілаў эксплуатацыі ваенных лятальных апаратаў, у выніку чаго мела месца па неасцярожнасці смерць двух і больш асоб).

Згодна з загадам міністра абароны генерал-лейтэнанта Юрыя Жадобіна, у сувязі з правядзеннем расследавання часова прыпыненыя палёты авіяцыі Узброеных сіл Беларусі.

БелаПАН

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ