Новы праект чыгункі для «хуткаснага цягніка» (TGV) стаў самым маштабным чыгуначным праектам ЭЗ за апошнія гады.
15 сакавіка Віцэ‑прэзыдэнт Эўрапейскай Камісіі, Камісар па пытаньнях транспарту Жак Баро ўрачыста адкрыў новую хуткасную лінію, што злучае Парыж і Братыславу.
«Свабоднае перамяшчэньне людзей ёсьць адным з ключавых элемэнтаў аб’яднанай Эўропы і гандлю ўнутры кантынэнту», пракамэнтаваў падзею Жак Баро. «Чыгунка, што злучае Парыж і Братыславу, пройдзе ў самым сэрцы эўрапейскага кантынэнту, дзе жыве каля 10% насельніцтва Эўразьвязу», — адзначыў Камісар.
Лінія, што злучае Парыж і Братыславу, пройдзе праз Страсбург, Штутгарт, Мюнхен і Вену. У прыватнасьці, падарожжа з Парыжу ў Страсбург (каля 500 кілямэтраў) зойме 2 гадзіны 20 хвілінаў.
Праект прафінансавалі 22 партнэры; пры гэтым адзін з найбольшых унёскаў зрабіла Эўрапейская Камісія (241 млн. эўра – 7% агульнай вартасьці праекта). Для пабудовы лініі было выкарыстана 12 млн. тонаў матэрыялаў, што ў 1 333 разы перавышае вагу Эйфэлевай вежы.
TGV (train a grande vitesse – высокахуткасны цягнік) – першапачаткова французскі канструктарскі праект. На сёньняшні дзень цягнікі TGV ходзяць пераважна ў Францыі, а таксама паміж Францыяй і Бэльгіяй, Нідэрляндамі, Вялікабрытаніяй, Швэйцарыяй, Нямеччынай і Італіяй. Новы праект адкрывае ўсходні трансэўрапейскі накірунак хуткаснай лініі (TGV‑Est).
Цягнік можа разьвіваць хуткасьць да 547 кілямэтраў у гадзіну.
Лінія будзе адкрытая для пасажыраў 10 чэрвеня 2007 г. Чакаецца, што новым маршрутам штогод скарыстаецца 11 млн. пасажыраў.
