Аспірантка Акадэміі кіравання пры прэзідэнце Вольга Праляскоўская напісала артыкул пра рэвалюцыі праз Фэйсбук «Мабілізацыя ў сетцы. Інтэрнэт як сучасны сродак кансалідацыі пратэставых масаў».
Ён апублікаваны ў часопісе «Беларуская думка» ў рубрыцы «Слова маладым вучоным».
Ключавая думка Вольгі Праляскоўскай ў тым, што ва ўмовах «крызісу дзяржаўных ідэалогіяў» робяцца запатрабаванымі «малыя ідэалогіі субкультураў». У найбольшай ступені яны маюць уплыў на моладзь «з прычыны няўстойлівых асобасных каштоўнасцяў».
Праляскоўская прыводзіць прыклады таго, як інтэрнэт зацягваў моладзь ў закалоты падчас рэвалюцыяў у Егіпце, Емене і Лівіі.Гэтыя рэвалюцыі яна называе «дзіўнымі». На заканчэнне маладая даследчыца палітычных тэхналогіяў цытуе Аляксандра Лукашэнку з заяваю пра «інвестыцыі ў моладзь як у нашу будучыню». «Не менш важныя згуртаванасць соцыуму, упэўненасць людзей у справядлівасці і жыццяздольнасці грамадскага ладу, давер да палітычных лідараў», — падсумоўвае аўтарка.
Цікава, што аўтарка ставіць на адну дошку «ідэалогіі сэксуальных меншасцяў, экалагічных груп, праваабаронцаў і г.д." Адзін гэты перл паказвае на ступень навуковасці артыкула і выдання.
Што да сітуацыі ў Беларусі, Вольга Праляскоўская сцвярджае, што «апаненты ўлады прыкрываюць свае намеры збітымі крадзенымі лозунгамі,а канцэпт «моладзь — гэта будучыня» выкарыстоўваюць дзеля прасоўвання ўласнай ініцыятывы «Рух будучыні».
Аўтарка заклікае да захадаў «для недапушчэння кансалідацыі насельніцтва ў межах негатыўнай праграмы».
Каментары