Вучняў ня трэба заахвочваць, каб падымалі руку, калі хочуць адказаць на ўроку, бо гэта можа шкодзіць нясьмелым дзецям — рэкамэндавала ў пятніцу брытанскае адукацыйнае ведамства.
Праведзеныя дасьледаваньні выявілі, што некаторыя дзеці ўва ўзросьце 7‑11 год пачынаюць у школе адставаць ад аднагодкаў, бо пазьбягаюць зьвяртаць на сябе ўвагу на ўроках, лічаць за лепшае заставацца «непрыкметнымі» і маюць нізкую асэртыўнасьць.
Адукацыйнае ведамства лічыць, што неабходны іншы падыход да такіх дзяцей, каб дапамагчы ім прасоўвацца ў навучаньні. Настаўнікам былі прапанаваныя розныя стратэгіі — самім выбіраць вучняў для адказу, даваць вучням 30 сэкундаў часу падумаць, перш чым адказаць, заахвочваць вучняў у парах абмяркоўваць адказ на пытаньне настаўніка і г.д.