У нядзелю 15 верасня ў Беларуска-амерыканскім цэнтры ў горадзе Саўт-Рывер у штаце Нью-Джэрсі (ЗША) адбылася ўрачыстая прэзентацыя кнігі Янкі Запрудніка пра фестывалі й выстаўкі ў Нью-Джэрсі.
У кнізе апісаны падзеі ад 1948-га па 2011-ты год. Арганізаваў прэзентацыю Беларускі Інстытут Навукі і Мастацтва.
Пасля багаслужбы ў царкве св. Еўфрасінні Полацкай прасторная зала цэнтра, упрыгожана афішамі і павялічанымі каляровымі здымкамі былых фестываляў і выставак, напоўнілася людзмі зблізку і здалёку.
Урачыстасць адкрыў уступным словам др. Вітаўт Кіпель, дырэктар Беларускага Інстытута Навукі і Мастацтва. Прамаўляў таксама аўтар кнігі Янка Запруднік.
Шмат хто з гасцей набыў сабе публікацыю з аўтографам аўтара. Кніга, багата ілюстраваная, напісана на дзвюх мовах: ангельскай і беларускай.
Выданне атрымала вельмі прыхільныя водгукі і ацэнкі ад чытачоў.
Спампаваць кнігу можна па гэтай спасылцы.
