Гомельскі абласны цэнтр гігіены, эпідэміялогіі і грамадскага здароўя ўстанавіў прычыну масавага атручэння школьнікаў у Мазыры.
Як паведамілі ў цэнтры гігіены, дзеці трапілі ў бальніцу з-за інфекцыйнага агента ў глазураваных сырках, якія давалі ў той дзень на сняданак у сталовых. Цяпер устанаўліваецца крыніца заражэння і высвятляецца, на якім этапе — захоўвання ці перавозкі — інфекцыйны агент трапіў у сыркі.
Нагадаем, у інфекцыйнае аддзяленне Мазырскай гарадской бальніцы 19 і 20 верасня брыгады хуткай дапамогі даставілі 71 школьніка, пераважна вучняў пачатковых класаў. Дзяцей даставілі з першасным дыягназам «харчовае атручэнне». Большасць пацярпелых пасля аказання першай медыцынскай дапамогі — прамывання страўніка — былі адпушчаны дамоў. Трынаццаць чалавек шпіталяваны. Ім паставілі дыягназ «харчовая таксікаінфекцыя».
Па факце масавага атручэння дзяцей упраўленне СК па Гомельскай вобласці распачало справу на падставе ч. 1 арт. 336 Крымінальнага кодэкса (парушэнне санітарна-эпідэмічных правіл).
