Пра гэта карэспандэнту CNN у Пентагоне Барбары Стар расказалі дзве афіцыйныя асобы, якія пажадалі застацца неназванымі.
Чыноўнікі адзначылі, што ўпэўненасці ў такім развіцці падзей няма, але ў апошнія 3-4 дні былі «трывожныя прыкметы».
«Гэта змяніла нашу думку ў бок таго, што імавернасць далейшага расійскага ўварвання больш высокая, чым лічылася раней», — сказаў адзін з чыноўнікаў.
Чальцы камітэта па ўзброеных сілах Палаты прадстаўнікоў ад рэспубліканцаў у сераду ўвечары накіравалі ліст у Белы дом, выказаўшы заклапочанасць з нагоды гэтых пагроз.
Амерыканская разведка лічыць, што расійскія войскі будуць рухацца ў напрамку трох гарадоў Украіны: Харкаў, Луганск і Данецк, — каб з’яднаць сушай сваю тэрыторыю з Крымам.
Расійскія войскі ў цяперашні час размешчаныя ў Растоўскай, Курскай і Белгарадскай абласцях, данесла разведка ЗША. На мяжы з Украінай сканцэнтравана больш за 30 тысяч салдат РФ, гатовых да «кідка».
Акрамя таго, у стан мабілізацыйнай гатоўнасці прыведзеныя падраздзяленні, размешчаныя ў глыбіні расійскай тэрыторыі.
У камітэце па ўзброеных сілах Палаты прадстаўнікоў не выключаюць і кідка ў Прыднястроўе, і спробы захапіць тэрыторыі ў краінах Балтыі.
Генерал Філіп Брыдлаў, камандуючы сіламі НАТО, сказаў кангрэсменам, што сканцэнтраваных ля межаў рускіх сіл для гэтага дастаткова.
Напярэдадні ўкраінскія СМІ паведамлялі, што Расія працягвае канцэнтраваць войскі на мяжы з Украінай, куды падцягваюць элітныя танкавыя і гвардзейскія падраздзяленні.