Еўракамісія выдзеліла першыя 750 млн еўра на прыярытэтныя праекты па энергетычнай незалежнасці.
Пра гэта паведамляе «Укрінформ» са спасылкай на швейцарскае дзелавое выданне Romandie.com.
«Еўрапейская камісія абвясціла аб выдзяленні першага траншу ў суме 750 млн еўра з бюджэту ЕС на суфінансаванне прыярытэтных праектаў, якія складаюць агульную інфраструктуру дзяржаў-членаў у сферы энергетыкі», — гаворыцца ў паведамленні.
У гэтым кантэксце выданне цытуе еўракамісара па пытаннях энергетыкі Гюнтэра Этынгера, які заявіў, што «цяперашні крызіс ва Украіне падкрэслівае важнасць развіцця энергетычнай інфраструктуры і будаўніцтва тых звёнаў, што адсутнічаюць паміж дзяржавамі-членамі, з мэтай умацавання энергетычнай бяспекі Еўрасаюза».
Усяго для рэалізацыі прыярытэтных праектаў плануецца вылучыць 5,85 млрд еўра на працягу 2014—2020. Сродкі будуць выдзяляцца ў рамках Еўрапейскага механізму аб'яднаных энергасістэм.
Першы транш выдзелены для фінансавання даследаванняў і будаўніцтва шэрагу праектаў. Паведамляецца, што спіс праектаў быў зацверджаны Еўрапейскай камісіяй яшчэ ў кастрычніку 2013 года.
Ён уключае ў сябе каля 250 праектаў энергетычнай інфраструктуры, у тым ліку і будаўніцтва газаправода Midcat паміж Іспаніяй і Францыяй.
