Вось што расказала нам чытачка Настасся:
«Мажліва, Вам будзе цікава сітуацыя, якая сёння мяне вельмі абурыла. Хоць у РБ такое нікога не здзіўляе.
Сёння мая мама мне патэлефанавала і сказала адпісацца ад усіх апазіцыйных / рэвалюцыйных суполак Укантакце. Вось што яна мне распавяла.
Укантакце ёсць суполка «Рэвалюцыя праз сацыяльную сетку — Рух будучыні». Дык вось, ідэалагічны аддзел райвыканкама горада Крупкі знайшоў усіх падпісантаў з Крупак — 70 чалавек іх было (ужо стала 68).
Сярод гэтых людзей была дачка галоўнага бухгалтара і галоўны эканаміст райвыканкама (якая, дарэчы, знаходзіцца ў дэкрэтным адпачынку). Дык вось, гэтых жанчын сёння выклікалі ў райвыканкам і пагражалі звальненнем.
Відавочна, што магчымасць паўтарэння украінскай рэвалюцыі ў Беларусі іх вельмі хвалюе, калі пачалі чапляць людзей за падпіскі ў сацыяльных сетках», — робіць выснову чытачка Настасся.
