Мінскі пратакол не прадугледжвае федэралізацыі або адчужэння ўкраінскіх тэрыторый, заявіў на пасяджэнні ўрада прэзідэнт Украіны Пятро Парашэнка.
«Пратакол прадугледжвае захаванне незалежнасці Украіны на ўсёй тэрыторыі, у тым ліку і на тэрыторыі Данбаса», — заявіў ён.
Прэзідэнт дадаў, што «ні пра якую федэралізацыю, ні аб якім адчужэнні ў пратаколе не гаворыцца», як і не згадваюцца так званыя «ДНР» і «ЛНР».
Парашэнка адзначыў, што Данецкай і Луганскай абласцям дадуць, згодна з Мінскім пратаколам, асаблівы статус. Адпаведны закон унясуць у Вярхоўную Раду на наступным тыдні.
«Закон Украіны аб часовым парадку мясцовага самакіравання ў асобных раёнах Данецкай і Луганскай абласцей прадугледжвае выразна статус гэтых рэгіёнаў у складзе Украіны», — сказаў ён.
Напярэдадні так званы «віцэ-прэм'ер ДНР» Андрэй Пургін заявіў, што сепаратысты імкнуцца да «самавызначэння ў адміністрацыйных межах Данецкай і Луганскай абласцей».
«Украіна будзе спрабаваць пакінуць нас часткай сваёй прасторы, аднак мы працягнем курс на самавызначэнне», — сказаў ён.
