На беларуска-польскай мяжы ў пункце пропуску «Брузгі» ўвечары 13 кастрычніка быў затрыманы сустаршыня аргкамітэта па стварэнні партыі «Беларуская хрысціянская дэмакратыя» Павел Севярынец.
Увагу мытнікаў прыцягнулі кнігі Зянона Пазняка, якія палітык вёз з сабой. Яго ссадзілі з рэйсавага аўтобуса з рэчамі і адправілі на пільны надгляд.
Да трэцяй гадзіны ночы супрацоўнікі гродзенскай мытні складалі паперы аб канфіскацыі.
Цяпер кнігі «Тэрра Дэй», «Развагі», «Парcіваль» і іншыя будуць накіраваныя ў Гродзенскі гарвыканкам у камісію па экстрэмізме, паведамляе Еўрарадыё.
«Гродзенскія мытнікі павінныя ставіць помнік Зянону Пазняку як заснавальніку Рэспублікі Беларусь і дзяржаўнай мытні, а не канфіскоўваць ягоныя кнігі на мяжы. Добра, што ў Гарадзенскім аблвыканкаме цяпер будуць уважліва чытаць мастацкія кнігі і публіцыстыку Зянона», — сказаў Севярынец.
Ён збіраецца абскардзіць канфіскацыю кніг.