На памежным пасту Мядзінінкай (Меднікі) не прапусцілі ў Літву з Беларусі цягач, бо выпраменьваны брыкетамі з драўнянага пілавіння радыяцыйны фон перавышаў норму.
У ноч з чацвярга на пятніцу памежнікі Падваранскай заставы Вільненскага атрада правялі праверку аўтамабіля DAF. Дакументы 61-гадовага кіроўцы аўтамабіля з беларускімі дзяржнумарамі былі ў парадку, паведамляе Служба аховы дзяржаўнай мяжы.
Пры праходжанні транспартнага сродку праз «радыяцыйную браму» спрацаваў сігнал, які паведаміў пра перавышэнне радыяцыйнага фону. Устаноўлена, што груз выпраменьвае 0,35 мікрасіверта, або 35 мікрарэнтген/г, у той час як дапушчальная норма — 0,2 мікрасіверта, або 20 мікрарэнтген.
Памежнікі кваліфікавалі і крыніцу выпраменьвання. Гэта — цэзій 137, па даўгавечнасці які лічыцца адным з небяспечных ізатопаў у прыродзе.
Адпраўнік грузу — беларуская фірма, атрымальнік — ЗАТ у Каўнаскім раёне. У пятніцу ўначы кіроўца і грузавік вярнуліся ў Беларусь.
