У абед 13 ліпеня ў вагоне мінскага метро на лініі «Каменная горка—Магілёўская» адбылася бойка.
Інфармацыя з'яўляецца на старонцы ў Фэйсбуку Юліі Хлашчанковай. Дзяўчына кажа, што проста ў нейкі момант на станцыі «Спартыўная» адзін мужчына пачаў біць другога. Яна ж стала ціснуць на кнопку «экстранная сувязь з машыністам», каб выклікаць ахову.
Аднак ахова метрапалітэна з'яўляецца толькі на станцыі «Маладзёжная».
«Што такое прафесіяналізм службаў бяспекі ў метро? — піша Юлія. — Гэта калі ў вагоне пачынаецца бойка, і пакуль увесь вагон ўцякае ў дальні кут, ты 2 станцыі (!!!!) тэлефануеш машыністу — а там нуль па фазе. У гэты час мужчыны ўключаюцца ў разніманне бойкі, так што, працэс становіцца масавым. Нарэшце на адной з станцый з'яўляецца служба бяспекі, затрымлівае ўдзельніка бойкі, забірае іншага з вагона — і ўсё. Цягнік зачыняе дзверы, а ты крычыш: а сведак ўзяць? У ахоўніка на твары з'яўляецца думка, кшталту «ад***» і ён крычыць табе ў адказ: «Патэлефануйце ў 102».
Юлія тэлефануе ў 102. Аднак, кажа, там пра здарэнне… нічога не ведаюць.
Ва УУС па ахове Мінскага метрапалітэна праз паўгадзіны пасля здарэння Еўрарадыё паведамляюць, што ўдзельнікі бойкі затрыманыя, ёсць сведкі, ідзе разбіральніцтва. Пазней прэс-сакратар ГУВД Аляксандр Ластоўскі распавядае што бойка адбылася паміж станцыямі Пушкінская і Маладзёжная.
«У вагоне метро, які рухаўся з Пушкінскай да Маладзёжнай, адбыўся канфлікт двух раней не знаёмых асобаў 1990 і 1976 гадоў нараджэння, якія, як я разумею, сустрэліся на вуліцы, толькі што пазнаёміліся, магчыма, былі нападпітку. Прычына — непрыязнае стаўленне адзін да аднаго на бытавой глебе».
Юлію Хлашчанкову ўсё ж выклікаюць у міліцыю, даведваюцца пра падрабязнасці здарэння. А героі дня, якія напалохалі пасажыраў, паводле Юліі, памірыліся.