Пасля матча барысаўскага БАТЭ супраць леверкузенскага «Баера», які скончыўся з лікам 1:1, з боку расійскіх пракрамлёўскіх актывістаў, а таксама футбольных фанатаў пачаліся нападкі на беларускую мову і права беларускай дзяржавы на існаванне ў прынцыпе.
Прычынай стаў перформанс барысаўскіх фанатаў, подпіс да якога быў выкананы на беларускай мове і гучаў як «паверце ў свае сілы, а мы падтрымаем».
Адна з самых вядомых расійскіх суполак футбольных заўзятараў «Ультрас Навіны», якую мадэруе былы фанат маскоўскага «Спартака», а цяпер вядомы пракрамлёўскі актывіст Іван Катанаеў па мянушцы «Камбат», апублікавала фатаграфію барысаўскага перформансу з наступным подпісам, які мы прыводзім на мове арыгінала з поўным захаваннем аўтарскай арфаграфіі:
«Вы только гляньте — це белоруска мова! Вообще, на некоем подобии белорусской мовы в самой белоруссии говорят только в деревнях и непролазных селах. Встретить этот собачий лай в крупных городах практически невозможно. Интересно, хоть один игрок на поле смог нормально прочитать и понять чего там написано? Падтрымают они, м***ки!
Белорусы, гоните в шею всех этих малолетних кретинов пытающихся этот собачий лай сделать своим языком, иначе не успеете моргнуть как превратитесь в украинцев! Не давайте селюкам даже голову поднять — пусть гоняют скот в деревнях и картошку растят!»
Дарэчы, сам аўтар, як можна пабачыць з вышэйпрыведзенага паста, нават сваёй роднай расійскай мовы толкам не ведае – дапускае шмат памылак.
У каментарах да паста знайшліся не толькі тыя, хто яго заўзята падтрымаў, але і прадстаўнікі расійскага фанацкага руху, якія лічаць, што аўтар такім чынам толькі пагаршае стаўленне іншых народаў да рускіх.
Катанаеў у лагеры сепаратыстаў на Данбасе. Фота з яго старонкі «УКантакце»
Варта адзначыць, што Іван Катанаеў быў заснавальнікам і лідарам аб’яднання фанатаў маскоўскага «Спартака» «Фратрыя», але быў выключаны з яго і адрынуты фанатамі «Спартака» ў 2010 годзе з-за ўдзелу ў фінансавых махінацыях, якія негатыўна адбіліся на расійскім фанацкім руху і мэтай якіх было асабістае ўзбагачэнне Катанаева. Дагэтуль ён з’яўляецца персонай нон-грата ў расійскім фанацкім руху.
У той жа момант ён вядзе пракрамлёўскую фанацкую суполку ў сацыяльнай сетцы «УКантакце», збірае грошы на дапамогу тэрарыстам, што ваююць на ўсходзе Украіны, а таксама ўдзельнічае ў разнастайных масавых мерапрыемствах, арганізаваных расійскімі ўладамі.
