Забітая жанчына — 60-гадовая грамадзянка ЗША. Сярод пяці параненых — грамадзяне Брытаніі, ЗША, Аўстраліі і Ізраіля.
Фота AFP.
Што вядома пра напад
Паведамленне пра напад на плошчы Расэл-сквер у цэнтры Лондана паступіла ў паліцыю ў сераду, 3 жніўня, у 22:33 па мясцовым часе (00:33 чацвярга па Мінску).
Людзі, якія патэлефанавалі ў паліцыю, сказалі, што невядомы мужчына з нажом атакуе мінакоў.
Паліцыянты, як сцвярджае Скотленд-ярд, прыбылі на месца злачынства цягам шасці хвілін.
Паліцыі ўдалося затрымаць зламысніка без адзінага стрэлу, ужыўшы электрашокер.
Расэл-сквер размешчаны за вуглом Брытанскага музея, вакол плошчы — шмат гатэляў.
Фота EPA.
Што вядома пра нападнікаў
Нападнікам аказаўся 19-гадовы грамадзянін Нарвегіі самалійскага паходжання.
Імя зламысніка не называецца.
Ён быў дастаўлены ў бальніцу, а пазней пераведзены ў паліцэйскі ўчастак.
Што вядома пра матывы нападу
Найбольш імавернай прычынай нападу паліцыя лічыць нестабільны псіхічны стан хлопца.
Па словах паліцыянтаў, яны зыходзяць з таго, што напад быў справакаваны псіхічным станам злачынцы, а сваіх ахвяр малады чалавек абраў выпадкова.
«Хачу адзначыць, што мы пакуль не знайшлі ніякіх дадзеных, якія маглі б паказаць на сувязь нападніка з тэрарыстычнымі арганізацыямі», — сказаў намеснік кіраўніка Скотленд-ярда Марк Раўлі.
На наступны дзень да месца нападу прынеслі кветкі. Фота EPA.
Што вядома пра ахвяраў нападу
У выніку нападу 60-гадовая грамадзянка ЗША памерла на месцы.
Яшчэ пяць чалавек атрымалі раненні — сярод іх грамадзяне Вялікабрытаніі, ЗША, Аўстраліі і Ізраіля. Па дадзеных Скотленд-ярда, два чалавекі па-ранейшаму знаходзяцца ў бальніцы, але іх жыццю нічога не пагражае.
У аўторак мэр Лондана Садок Хан і кіраўнік лонданскай паліцыі сэр Бернард Хоган-Хоў паабяцалі, што праз пагрозу тэрактаў на вуліцах Лондана стане адчувальна больш узброеных паліцэйскіх патрулёў.
