Амерыканскі прэзідэнт Дональд Трамп падзяліўся ў Twitter заклікам юрыста Джэры Фалуэлла-малодшага падоўжыць яго прэзідэнцкі тэрмін на два гады з прычыны расследавання спецпрокурора Роберта Мюлера.
«Трампу павінны дадаць два гады да яго першага тэрміна ў якасці кампенсацыі за час, скрадзены гэтым карумпаваным і праваленым дзяржпераваротам», — напісаў юрыст, кіраўнік Універсітэта Ліберці.
Як перадае РБК, Трамп пагадзіўся, што ў яго «скралі» два гады прэзідэнцтва, якія «немагчыма вярнуць». Пры гэтым ён выказаў меркаванне, што гэты перыяд быў самым паспяховым у гісторыі.
У красавіку Мінюст ЗША апублікаваў даклад Роберта Мюлера аб умяшанні Расіі ў выбары амерыканскага прэзідэнта ў 2016 годзе. Па выніках расследавання, камісія не знайшла сведчанняў змовы каманды Трампа з Масквой.
