Сымпатыі беларускіх заўзятараў – на баку зборнай Украіны. Такі вынік дало апытаньне, праведзенае на сайце газэты «Прессбол».
З 3629 прагаласавалых 23% хварэюць на чэмпіянаце сьвету па футболе за Ўкраіну. На другім месцы – Англія (18%). А вось бразыльцы апынуліся толькі трэцімі з 14%.
Цікава, што яшчэ адна зборная суседняй краіны – Польшча – асаблівых пачуцьцяў у беларускіх аматараў футболу не выклікае. За яе перажываюць толькі 1% прагаласавалых. Нават у Кот Д’івуару болей прыхільнікаў (2%).
А самым нелюбімым па выніках апытаньня аказаўся Парагвай. Чаму ў Беларусі гэтак недалюбліваюць гэтую лацінаамэрыканскую зборную, сказаць цяжка. Але факт застаецца фактам: нават у Савудаўскай Арабіі знайшлося 7 прыхільнікаў. А за Парагвай хварэюць усяго 2 ўдзельнікі апытаньня.
Адметна, што згодна зь іншым апытаньнем, якое цяпер праходзіць на сайце naviny.by, беларусы вераць у шчасьлівую зорку ўкраінскай каманды. На момант падрыхтоўкі гэтага матэрыялу вынікі галасаваньня выглядалі так: 14,7% рэспандэнтаў верылі, што зборная Ўкраіны стане чэмпіёнам сьвету! Прыкладна столькі сама прагаласавалых прарочаць суседзям нявыхад з групы. Але гэта скрайнія пункты погляду, а большасьць удзельнікаў апытаньня лічыць, што ўкраінская зборная спыніцца ў 1/8 фіналу (37%) альбо ў чвэрцьфінале (20,7%).
