У гэты ўік-энд да ўсяго гэтага дададуцца першая і другая лігі, каб стварыць ва ўсім акіяне каранавіруса цэлую паўнавартасную выспу з крэпасцю, што абараняе футбол у Еўропе ад поўнага знікнення.
Разам з Букмекерскай канторай Леон мы працягваем асвятляць найлепшы футбольны чэмпіянат у свеце.
Пасля правалу на старце БАТЭ здолеў перамагчы ў двух апошніх турах, наблізіўшыся да першага месца на адлегласць адной перамогі. На вяршыні ж апынулася жодзінскае «Тарпеда-БелАЗ», якое ў вочнай дуэлі ўпэўнена перагуляла «Энергетык-БДУ».
Працягваюць буксаваць «Шахцёр» і мінскае «Дынама». У салігорцаў чарговая нулявая нічыя — на гэты раз са «Смалявічамі», а мінчукі наогул нечакана прайгралі «Гарадзеі».
Вось як скончыліся матчы чацвёртага тура:
- «Нёман» — «Белшына» 1:1 (42, Кадзімян — 59, Ковель)
- «Слуцк» — «Віцебск» 1:1 (63, Каанда — 32, Нікалаеску)
- «Тарпеда-БелАЗ» — «Энергетык-БДУ» 2:0 (55, Хачатуран; 66, Рамас)
- «Гарадзея» — «Дынама-Мінск» 1:0 (14, Архіпаў (п))
- «Мінск» — БАТЭ 0:3 (26, Драгун; 34, Сарока; 62, Няхайчык)
- «Смалявічы» — «Шахцёр» 0:0
- «Дынама-Брэст» — «Іслач» 3:1 (45+2, Габі; 77, Мілеўскі; 90+4, Савіцкі (п) — 39, Камароўскі)
- «Славія» — «Рух» 0:0
Давайце паглядзім, што нас чакае ў наступным туры.
«Энергетык-БДУ» — «Гарадзея»
- 16.04, 17:30. Мінск, РЦАР-БДУ.
- Каэфіцыенты: «Энергетык» (перамога) — 1.78; нічыя — 3.75; «Гарадзея» (перамога) — 5.25.
«Гарадзея» з'яўляецца самай невідовішчнай камандай чэмпіянату з мінімумам створаных небяспечных момантаў, але «цукровыя» ўжо здабылі дзве перамогі: першую ў Бабруйску дзякуючы штрафному ўдару, другую — дзякуючы пенальці. Эфектыўнасць зайздросная.
Фота: ФК «Гарадзея»
Перад мінулым турам з'явілася інфармацыя, што гульню можа прапусціць лідар «студэнтаў» Джасурбек Яхшыбоеў з-за траўмы. Але ў Жодзіне ўзбек згуляў, але не дапамог камандзе. Цяпер бойкая каманда будзе імкнуцца рэабілітавацца ў матчы з «Гарадзеяй».
Прагноз «НН»: «Энергетык» пераможа.
«Дынама-Мінск» — «Нёман»
- 16.04, 19:30. Мінск, стадыён «Дынама».
- Каэфіцыенты: «Дынама» (перамога) — 1.85; нічыя — 3.47; «Нёман» (перамога) — 5.25.
Мінчукі ў чатырох турах набралі толькі тры балы — гэта зусім не тое, чаго мы чакалі ад каманды Гурэнкі. Наперадзе «Дынама» — сустрэча з «Нёманам», які гуляе ў вязкі абарончы футбол.
Эксперты ўпэўнена лічаць гаспадароў фаварытамі гульні. Але нам здаецца, што недаацэньваць гарадзенцаў не варта. Тыя хоць і ўпусцілі перамогу над «Белшынай», але могуць стварыць сюрпрызы любому суперніку.
Прагноз «НН»: «Нёман» не прайграе.
«Белшына» — «Смалявічы»
- 17.04, 17:30. Бабруйск, стадыён «Спартак».
- Каэфіцыенты: «Белшына» (перамога) — 2.53; нічыя — 3.10; «Смалявічы» (перамога) — 3.31.
Як ужо паспелі пажартаваць у інтэрнэце, што праз каранавірус футбол настолькі ачышчаны, што ў яго вярнуліся галы Леаніда Ковеля. На рахунку некалі легендарнага форварда абодва мячы «Белшыны», апошні з якіх падараваў камандзе першы турнірны бал.
«Смалявічы» набралі на адзін бал больш, але абедзве нічые былі здабытыя ў матчах з топамі: брэсцкім «Дынама» і «Шахцёрам». Патэнцыял у каманды Бразевіча ёсць, ім трэба толькі скарыстацца.
Прагноз «НН»: тотал, меншы за 2.5.
«Шахцёр» — «Слуцк»
- 17.04, 19:30. Салігорск, стадыён «Будаўнік».
- Каэфіцыенты: «Шахцёр» (перамога) — 1.44; нічыя — 4.85; «Слуцк» (перамога) — 8.25.
У «Шахцёра» вялікія праблемы ў атацы. Каманда забівала ўсяго ў адным туры з чатырох, што і адбіваецца на пазіцыі салігорцаў у табліцы. Але варта адзначыць, што прапусцілі яны ўсяго адзін мяч.
«Слуцк» і забівае прыстойна, але і прапускае нямала. Такая гульня падабаецца шматлікім замежным заўзятарам, якіх з кожным днём становіцца ўсё больш. Цяпер пытанне: ці парадуе іх каманда ў матчы супраць вельмі сур'ёзнага суперніка?
Арцём Сярдзюк прабіў нагой рэкламны шчыт — гэты момант стаў мемам сярод замежных заўзятараў «Слуцка». Фота: ФК «Слуцк»
Прагноз «НН»: тотал, меншы за 2.5.
«Іслач» — «Славія»
- 18.04, 14:00. Стадыён ФК «Мінск».
- Каэфіцыенты: «Іслач» (перамога) — 2.18; нічыя — 3.33; «Славія» (перамога) — 3.85.
«Славія» разам з «Энергетыкам» складаюць пару каманд, якія здзіўляюць больш за ўсё. Мазырчукі за адзін крок ад фіналу Кубка, а ў чэмпіянаце абгулялі БАТЭ і брэсцкае «Дынама».
«Ваўкі» пасля бойкага старту прайгралі дзве апошнія гульні, прапусціўшы ажно шэсць мячоў. Тактыка ў тры цэнтральныя абаронцы дае збоі. Чым Жукоўскі будзе здзіўляць у матчы са «Славіяй»?
Прагноз «НН»: «Славія» не прайграе.
«Рух» — «Мінск»
- 18.04, 16:00. ДАСК «Брэсцкі».
- Каэфіцыенты: «Рух» (перамога) — 2.61; нічыя — 3.22; «Мінск» (перамога) — 3.07.
«Рух» забіў менш за ўсіх у чэмпіянаце — усяго аднойчы, і тое ў першым туры. А «Мінск» прапусціў 8 мячоў — больш за астатнія каманды.
У «Мінска» ёсць неблагі шанец зноў падцягнуцца да лідараў табліцы, але для гэтага трэба ўзламаць трывалую абарону берасцейцаў.
Прагноз «НН»: тотал, меншы за 2.5.
«Віцебск» — «Дынама-Брэст»
- 18.04, 18:00. ЦСК ФК «Віцебск».
- Каэфіцыенты: «Віцебск» (перамога) — 5.75; нічыя — 3.85; «Дынама» (перамога) — 1.71.
Два тыдні таму гульня з Віцебскам была перанесена ў Барысаў. Нібыта праз стан поля. Але пасля міністр аховы здароўя прызнаўся, што гэта было зроблена з-за небяспечнай эпідэміялагічнай сітуацыі ў горадзе. Босы федэрацыі працягваюць стаяць на сваім і звязваць перанос выключна з умовамі надвор'я.
Прайшло два тыдні, і матч нікуды не збіраюцца пераносіць. «Віцебск» прыме чэмпіёнаў Беларусі на сваім полі. У турнірнай табліцы каманды знаходзяцца побач, але фаварытамі эксперты лічаць берасцейцаў.
Прагноз «НН»: «Дынама» пераможа.
БАТЭ — «Тарпеда-БелАЗ»
- 18.04, 20:00. «Барысаў-Арэна».
- Каэфіцыенты: БАТЭ (перамога) — 1.46; нічыя — 4.80; «Тарпеда» (перамога) — 7.85.
Нягледзячы на першае месца ў табліцы, эксперты зусім не вераць у жодзінскае «Тарпеда».
Фота: ФК «Тарпеда-БелАЗ»
У гэтым ёсць логіка, бо жодзінцы з 2016 года не могуць перамагчы ў БАТЭ, а барысаўцы ў чэмпіянаце пачынаюць набіраць неблагі ход. Ці змогуць яны скінуць «Тарпеда» з першага радка?
Прагноз «НН»: БАТЭ пераможа.
У сувязі з распаўсюдам каранавіруса мы не раім вам наведваць людныя мерапрыемствы, у тым ліку футбольныя матчы. Калі ўсё ж вырашыце пайсці на стадыён, прытрымлівайцеся мераў засцярогі.
Дзяліцеся прагнозамі ў каментарах. Калі лічыце сябе экспертам у беларускім футболе, зрабіце стаўку ў Букмекерскай канторы Леон!
