Бегемотаў у Калумбіі прызналі інвазіўным відам. Фота: Getty Images
Пабла Эскабар стварыў сумна вядомы мэдэльінскі наркакартэль і стаў адным з самых багатых людзей у свеце. Апроч іншага, у яго быў прыватны заапарк з бегемотамі, фламінга, жырафамі, зебрамі і кенгуру.
У пачатку 1980-х Эскабар завёз у яго чатырох афрыканскіх бегемотаў. У 1993 годзе наркабарона застрэліла паліцыя, пасля чаго ўсіх жывёл прадалі ў заапаркі, акрамя бегемотаў. Іх адпусцілі ў прыроду. І цяпер у рацэ Рыа-Магдалена і яе прытоках налічваецца больш за 160 гэтых жывёлаў. Гэта найбольшая папуляцыя бегемотаў па-за межамі Афрыкі. Даследаванні паказалі, што за дзесяць гадоў калонія можа павялічыцца яшчэ ў чатыры разы.
Бегемоты, якіх ахрысцілі «какаінавымі» ў памяць аб наркабароне, не маюць натуральных ворагаў у Калумбіі і выцясняюць мясцовыя віды. Яны таксама забруджваюць ваду сваімі экскрэментамі, якія змяшчаюць бактэрыі і паразіты. Акрамя таго, гэтыя жывёлы бываюць агрэсіўнымі і нападаюць на людзей, якія жывуць ці працуюць паблізу ракі.
У пачатку 2022 года бегемоты былі ўнесены ў спіс так званых інвазіўных відаў краіны. Улады задумаліся, як зрабіць, каб гэтыя гіпапатамы не так шустра пладзіліся.
На гэтым тыдні ўрад Калумбіі абвясціў, што правядзе стэрылізацыю жывёл. І гэта толькі адна з трох мер, якія запланавала Міністэрства навакольнага асяроддзя ў рамках плана па кіраванні і кантролі над бегемотамі.
У міністэрстве заявілі, што стэрылізацыя — «складаны і дарагі працэс». Акрамя гэтага «існуе рызыка таго, што жывёлы памруць, што ў іх узнікне алергічная рэакцыя на анестэзію або персанал на месцы акажацца пад пагрозай».
Стэрылізацыя жывёлы каштуе ў сярэднім 40 мільёнаў песа (каля 9000 еўра). Яе плануецца пачаць на наступным тыдні. Урад хоча да канца года стэрылізаваць 20 жывёл. Пасля гэтага колькасць павінна павялічыцца да 40 за год.
Акрамя стэрылізацыі будуць разгледжаны магчымасці перасялення жывёл у іншыя краіны, такія як Мексіка, Індыя, Батсвана, Эквадор і Філіпіны, якія праявілі цікавасць да гэтых жывёл, або нават эўтаназія.
Чытайце яшчэ:
У Аўстраліі прапанавалі адстрэльваць кенгуру, каб яны не паміралі ад голаду
Прэзідэнт Калумбіі заклікаў легалізаваць какаін ва ўсім свеце
