Стала вядома, што за беларуску арыштавалі ў Польшчы за працу на КДБ 29

Дар'я Астапенка на з'ездзе «Гавары праўду» 19 верасня 2020 года. Фота: «Гавары праўду»

Дар'і Астапенка каля 36 гадоў, яна родам з Баранавічаў і па спецыяльнасці ветэрынар. Яшчэ да 2020 года дзяўчына кантактавала з рознымі апазіцыйнымі палітычнымі арганізацыямі і партыямі ў Беларусі, цікавілася іх дзейнасцю і хацела ў ёй удзельнічаць, прапаноўвала сваю дапамогу.

У прыватнасці, такім чынам Астапенка стала сябрам кампаніі «Гавары праўду». Яна з'явілася ў арганізацыі ў 2018-2019 гадах, была назіральніцай на выбарах, збірала подпісы, праходзіла адпаведныя ўнутраныя навучальныя трэнінгі ў Беларусі, як і іншыя шараговыя актывісты.

Да 2020 года дзяўчына вярнулася назад у Баранавічы, дзе ў яе з'явілася ўласнае жыллё. Падчас прэзідэнцкіх выбараў яна была каардынатаркай «Гавары праўду» па зборы подпісаў у Баранавічах і Баранавіцкім раёне і разам з маленькай камандай сабрала вельмі шмат — некалькі тысяч подпісаў. Пасля яна была даверанай асобай кандыдата ў прэзідэнты Андрэя Дзмітрыева.

Пасля выбараў Дар'я яшчэ некалькі разоў з'яўлялася ў «Гавары праўду», пабывала на з'ездзе арганізацыі ў Мінску 19 верасня 2020 года, але затым ніякага ўдзелу ў яе справах не брала.

У 2023 годзе Дар'я пакінула Беларусь і, па звестках «Люстэрка», з восені знаходзілася ў Польшчы. Спачатку яна прыехала ў Варшаву, затым пераехала ў горад Лодзь. Там жыла ў розных знаёмых, адчувала фінансавыя цяжкасці, брала грошы ў доўг, ёй дапамагалі сябры беларускай дыяспары.

Як паведамілі крыніцы «Люстэрка», Астапенка спрабавала наладжваць кантакты з актывістамі дыяспары, пранікнуць у вядучыя беларускія арганізацыі ў Польшчы, прапаноўваючы ім сваю валанцёрскую дапамогу, збірала інфармацыю пра дзейнасць харугваў паспалітага рушэння Валерыя Сахашчыка, у прыватнасці ў Беластоку. А таксама пра беларускіх добраахвотнікаў ва Украіне і тых, хто аказвае ім дапамогу.

Акрамя таго, жанчына вяла размовы пра тое, што трэба дзейнічаць больш актыўна для звяржэння ўлады ў Беларусі, а менавіта — сілавым шляхам: прапаноўвала збіраць зброю, прарывацца ў Беларусь, зладзіць выбух на беларускай мяжы.

У нейкі момант Дар'я, будучы нецвярозай, сама прагаварылася знаёмым пра сапраўдную мэту яе актыўнасці ў Польшчы. Пасля гэтага інфармацыю пра яе перадалі ў польскае агенцтва ўнутранай бяспекі, і ў той жа дзень, 20 снежня, яна была затрыманая. 

Ужо 22 снежня суд у Варшаве адправіў дзяўчыну ў СІЗА. Па словах крыніц, у смартфоне Астапенкі пасля затрымання знайшлі доказы яе супрацоўніцтва з КДБ Беларусі з 2017 года. Яна таксама перасылала куратарам усе здабытыя звесткі, фатаграфіі і іншую інфармацыю, якую ёй удалося даведацца ўжо ў Польшчы.

Цяпер абвінавачванне Дар'і Астапенка прад'яўлена па ч. 1 арт. 130 (шпіянаж) Крымінальнага кодэкса Польшчы. Ёй пагражае не менш за пяць гадоў пазбаўлення волі. 

Чытайце таксама:

Сёння кадэбісты зноўку далучыліся да заняткаў ВБУ. Расказваем, што яны маглі даведацца і як абараніць сябе ў анлайн-адукацыі

«Вы пад кантролем». Супрацоўнік КДБ падключыўся да анлайн-занятку Вольнага беларускага ўніверсітэта

Адшукалі чалавека, які, меркавана, пераводзіў грошы Алегу Аксёнаву ад КДБ

«Першыя дзве хвіліны думаў, што гэта жарт». Наведнік семінара па бяспецы, да якога далучыўся КДБ, расказаў, што там адбывалася

Афіцэр КДБ уключыўся ў жывы эфір семінара па бяспецы ў Беларускім моладзевым хабе

Nashaniva.com