БАТЭ да СТВ: «Плагіят стаў візітнай карткай тэлеканала» 14

Барысаўскі футбольны клуб часова пазбавіў акрэдытацыі журналістаў СТВ на хатнія матчы БАТЭ.

Справа ў тым, што ў матчы перанесенага 18-га тура чэмпіяната Беларусі паміж БАТЭ і «Шахцёрам», некаторыя заўзятары гаспадароў дазволілі сабе некалькі крэпкіх словаў у адрас галоўнага арбітра матча. Потым на тэлеканала СТВ з’явіўся рэпартаж, дзе паведамлялася, што падзеі на трыбунах адбываліся «з маўклівай згоды адміністрацыі стадыёна».

У БАТЭ замоўчваць гэтую сітуацыю не сталі. На афіцыйным сайце каманды нават з’явілася адпаведная заява, дзе адзначаецца: «БАТЭ не прыемае таго, што адбывалася падчас і адразу пасля хатняй гульні з салігорскім „Шахцёрам“. Мы прыносім Аляксандру Яўневічу свае прабачэнні», — гаворыцца ў заяве.

Словы, сказаныя ў эфіры СТВ, кіраўніцтва БАТЭ ацэньвае як «глупства і бздура, сфабракаванае „спецыялістамі“ тэлеканала». Таксама было адзначана, што вешаць «усіх сабак на заўзятараў» кіраўніцтва клуба не дазволіць нікому.

Было сказана некалькі рэзкіх словаў у дачыненні да тэлеканала СТВ. Найперш крытыка якасці трансляцый матчаў чэмпіяната Беларусі. «А яшчэ нарэшце заняцца выкараненнем плагіята, які, на жаль, стаў візітнай карткай канала», — гаворыцца ў заяве футбольнага клуба.

У выніку гэтага кіраўніцтва БАТЭ на аснове «Палажэння аб акрэдытацыі прадстаўнікоў СМІ» прыняло рашэнне пазбавіць тэлеканал СТВ акрэдытацыі да той пары, пакуль не будуць прынесеныя афіцыйныя прабачэнні.

Зміцер Панкавец

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ