Цяперашнія цяжкасці носяць часовы характар, і яны вырашальныя, заявіў старшыня савета рэспублікі Анатоль Рубінаў, адкрываючы 3 кастрычніка ў Мінску сёмую сесію верхняй палаты беларускага парламента.
У сваім уступным слове ён адзначыў, што апошнім часам у краіне абвастрыліся фінансавыя праблемы, перш за ўсё, звязаныя з валютай. Гэта, паводле слоў Рубінава, пацягнула павышэнне цэн на харчаванне і іншыя тавары, і, як вынік, зніжэнне пакупніцкай здольнасці насельніцтва.
«Усе гэтыя з’явы часовыя. Самае галоўнае, што рэальны сектар эканомікі развіваецца вельмі паспяхова», — сказаў ён. У якасці доказу ён прывёў шэраг эканамічных паказчыкаў, якія адлюстроўваюць рост ВУП, апераджальны рост экспарту над імпартам.
«Наша эканоміка набірае сілу, сітуацыя на валютным рынку ўзята пад кантроль урадам і Нацбанкам. <…> Ліквідаваны перадумовы для спекулятыўных аперацый. Урад адмяніў абмежаванні на куплю валюты для імпарту абсталявання, чым зрабіў важны крок да ўстанаўлення раўнаважнага валютнага курсу. Адзіны валютны курс зробіць рынак больш прадказальным, дазволіць суб’ектам гаспадарання вярнуцца да нармальных умоў працы», — адзначыў Рубінаў.
Разам з гэтым, паводле яго слоў, захаваны ранейшыя абавязацельствы дзяржавы перад насельніцтвам, прымаюцца дадатковыя меры ў інтарэсах грамадзян. «Гэта сведчыць аб тым, што мы не маем намеру адыходзіць ад курсу сацыяльна арыентаванай эканамічнай палітыкі», — заявіў Рубінаў. У прыватнасці, ён нагадаў, што з 1 лістапада будзе праведзены пераразлік працоўных пенсій, зыходзячы з зарплаты работнікаў за трэці квартал. Ён паабяцаў, што будуць расці дапамогі сем’ям, якія выхоўваюць дзяцей, стыпендыі. «Мэта гэтых мерапрыемстваў — не дапусціць падзення ўзроўню жыцця грамадзян. Прынятыя кіраўніком дзяржавы, урадам і Нацбанкам рашучыя меры ў пэўнай ступені стабілізавалі спажывецкі рынак і знялі напружанасць у грамадстве. Цяперашнія цяжкасці носяць часовы характар, і яны вырашальныя», — упэўнены Рубінаў.
