«Ордэн тампліераў», згаданы Брэйвікам, разаслаў пагрозы палітыкам і журналістам 4
Нарвежскія палітыкі і рэдактары газет у панядзелак увечары атрымалі ліст, падпісаны «намеснікам кіраўніка Ордэна іампліераў», які змяшчае пагрозы і патрабаванне вызваліць абвінавачанага ў тэрарызме Андэрса Брэйвіка.
Пасланне атрымалі дэпутаты парламента Нарвегіі і рэдактары найбуйнейшых газет па ўсёй краіне адразу пасля таго, як незалежная камісія па расследаванні тэракту 22 ліпеня мінулага года прадставіла свой даклад пра прычыны трагедыі.
У выпадку невыканання патрабаванняў аўтар пагражае знішчыць «вярхі грамадства» краіны.
Раней Андэрс Брэйвік заяўляў пра сваю прыналежнасць да таемнай арганізацыі «Рыцараў-тампліераў» і пра некалькі яе ячэек, якія вядуць барацьбу супраць мультыкультуралізму. Псіхіятры тады палічылі гэта прыкметай псіхічнага нездароўя падсуднага, а пракуроры на судзе абверглі яго дачыненне да падобнай арганізацыі.
Андэрс Брэйвік 22 ліпеня мінулага года зладзіў выбух ва ўрадавым квартале нарвежскай сталіцы, у выніку якога загінулі 8 чалавек, а таксама страляніну ў моладзевым лагеры рабочай партыі Нарвегіі на востраве Утоя, дзе ён забіў 69 чалавек.