«Самалёт «Белавія» цёк, туалеты жудасныя, мяса ліпкае» а якія Вашы меркаванні пра «Белавія» і мінскі аэрапорт? 64

Гарачая дыскусія разгарнулася між нашымі чытачамі пры абмеркаванні інфармацыі пра новыя рэйсы «Белавія». Піша чытачка Ганна.

«Я лётаю Белавія рэгулярна, бо з той жа Літвы няма рэйса ў Баку і Астану, куды я езджу ў камандзіроўкі. Ну і, натуральна, квіткі мне купляе кампанія. Рэйсы жудасныя.

Самалёт год назад цёк, як пры ўзлёце, так і пры пасадцы. Пацешна было глядзець на пасажыраў бізнэс-класа, адвешаных ад эканома анучкай, і з розніцай у тым, што ім далі кавалак рыбы з ліпкім пюрэ, а нам па бутэрбродзе, ад якога я адмовілася, бо вяндліна была ліпкая, а мой калега з’еў і мучыўся потым доўга. Дык вось, на тым рэйсе я назірала, як увесь палёт капала на віпаў вада, і яны ўсімі анучкамі і сурвэткамі затыкалі шчыліны.

Апошні раз гэтым летам ляцела, самалёт быў ніштаваты, але ежа — рэдкая дрэнь. Увесну ляцела з Баку ў Вільню, і квіток купіла праз Кіеў у Літву. Гэта было даўжэй, але «Аэрасвіт» у параўнанні з нашай «Белавія» — проста казка. Аэрапорт наш мінскі, калі праходзіш у залу чакання, — проста кашмар. Туалеты жудасныя. Кавярня працавала толькі адна, д’ютыфры запоўненыя беларускім шлакам, тыпу «Галатэі» і «Спартака». Прычым у Баку я купляла ў прэзэнт для дырэктара кампаніі цукеркі «Камунарка», дык у мінскім д’ютыфры яны каштуюць даражэй.

У адпачынак, лётаючы ў Еўропу і плацячы свае крэўныя, я лётаю літоўскімі кампаніямі, бо на іх можна даляцець да Мілана або да Барселоны за 100 еўра. І паверце, сэрвіс там на шмат лепшы. Дарэчы, цэны на рэйсы да Швецыі або Нарвегіі наогул па 40–60 еўра. І нешта я не думаю, што ў літоўцаў газа таннейшая, чым у нас.

Наогул, лётаю амаль штомесяц, таму маю права параўноўваць. Наша «Белавія» — жудасны савок і жыгуль мінулага стагоддзя, у параўнанні з кампаніямі нават СНД».

Процілеглага меркавання трымаецца чытач пад псеўданімам С. С. Гарбункоў. Ён лічыць, што цэны на «Белавія» сувымерныя або таннейшыя за кошты іншых дарагіх авіякампаній, а цэны лоўкостаў ніжэйшыя толькі таму, што там горшыя ўмовы пералёту (фіксаваная дата, абмежаванні на багаж, няма перакусу). Што да аэрапорта, то гэта не парафія авіякампаніі, зазначае ён.

Сяргей Гезгала

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ