Фільм «Антон тут побач» — найлепшы дакументальны дэбют у Абу-Дабі
Фільм Любові Аркус «Антон тут побач» прызнаны найлепшай дакументальнай дэбютнай працай на міжнародным кінафестывалі ў Абу-Дабі, які праходзіў з 11 па 20 кастрычніка.
Карціну «Антон тут побач» галоўны рэдактар часопіса «Сеанс» Любоў Аркус і аператар Алішэр Хамідхаджаеў здымалі чатыры гады. За гэты час галоўны герой фільма — хлопчык-аўтыст Антон Харытонаў — ператварыўся з мала прыстасаванага да нармальнага жыцця чалавека ў хлопца, які навучыўся размаўляць з людзьмі, усміхацца, «плакаць, гатаваць, размаўляць па тэлефоне, не баяцца сабак і жыць са сваім дыягназам».
Камера паказала жыццё не толькі Антона, але і яго бацькі, які сышоў з сям’і, і маці, у якой дыягнаставалі рак, і Расіі з усімі яе сацыяльнымі праблемамі.
Паўнавартасным удзельнікам карціны стала сама Любоў Аркус. Праз свой закадравы маналог яна расказала пра ўсё, з чым сутыкнуўся Антон. Пра ўсё, з чым сутыкнулася ў сваім жыцці яна сама. Пра ўсё, з чым наогул сутыкаецца чалавек — горыч, адзіноту, роспач, каханне, радасць.
Фільм «Антон тут побач» атрымаў на 69-м Венецыянскім кінафестывалі прыз Mouse d’argente італьянскіх інтэрнэт-крытыкаў. Стужку там прымалі апладысментамі, якія суправаджаюць цяпер фільм і на ўсіх паказах.
