Улада зноў зьвярнула ўвагу на стан найбуйнейшага ў Беларусі возера — прынята
Дзяржаўная праграма аздараўленьня экалягічнай абстаноўкі на возеры Нарач на 2005—2008 гг. Падобнае было ў 1981 г., калі ўрад БССР прыняў пастанову «Аб схеме комплекснага выкарыстаньня і аховы водных і зямельных рэсурсаў басэйну Нарачы».
Мерапрыемствы тады далі плён: такі сумарны паказчык якасьці вады, як празрыстасьць, у самыя неспрыяльныя гады (канец 1970-х — пачатак 1980-х) зьніжаўся да 2,5—3,5 мэтра, а пасьля ажыцьцяўленьня мерапрыемстваў падняўся да 6—7 мэтраў. І хоць цяпер ён трымаецца на такім жа ўзроўні, экалягічныя праблемы ня зьніклі і, на думку навукоўцаў, насьпела правядзеньне чарговага аздараўленьня.
Цяперашняя праграма прадугледжвае выкананьне 31 мерапрыемства. Гэта і правядзеньне навуковых дасьледаваньняў, экалягічнага маніторынгу, і будаўніцтва новых ачышчальных збудаваньняў, і добраўпарадкаваньне прыбярэжнай паласы ды населеных пунктаў, што знаходзяцца ў водаахоўнай зоне, і барацьба з браканьерствам. Плянуюць выдаткаваць толькі на прыродаахоўныя мерапрыемствы больш за 30 млрд руб. Для абгрунтаваньня гэтых мерапрыемстваў прыцягнуты навукоўцы з Нацыянальнай акадэміі навук і БДУ.
У сутнасьць экалягічных праблем паглыбляцца ня будзем. Раскажам пра захады, якія маюць зьменшыць непрыемныя моманты, што кідаюцца ў вочы адпачывальніку.
Цяпер на Нарачы, каб дабрацца да дастаткова глыбокага для купаньня месца, трэба адысьці ад берагу на добрыя сотні мэтраў. Таму (пакуль дзеля экспэрымэнту) паглыбяць дно на адным з найпапулярнейшых пляжаў — ля цеплахода.
Поўны варыянт чытайце ў папяровай і pdf-вэрсіі газэты "Наша Ніва"
Алесь Высоцкі, Мядзел